SQO-nyń áıelder kolonııasynda qaǵazdan salmaǵy 40 kg kóılek jasaldy
Soltústik Qazaqstan oblysyndaǵy áıelder kolonııasynda dástúrli «Mekeme arýy» baıqaýy ótti. Sottalǵandardyń biri qaǵazdan salmaǵy 40 kg bolatyn qazaqtyń ulttyq kıimin ázirlep, qazylar alqasynyń nazaryna usyndy», - dep habarlaıdy QazAqparat tilshisi.
SQO Qylmystyq-atqarý júıesi departamenti baspasóz qyzmetiniń málimetinshe, «Mekeme arýy» baıqaýy aldyńǵy jyldary «Mıss Pampýshka», «Sýper kelin» jáne «Qar hanymy» formatynda ótse, bıyl qatysýshylarǵa shyǵarmashylyq qyrlaryn kórsetýge shekteý qoıylmady.
Baıqaý 4 kezeńmen ótti: qyz-kelinshekter aldymen ózin tanystyrdy, keıin «defıle» uıymdastyrylyp, shyǵarmashylyq baıqaýǵa qatysty, sondaı-aq bilim saıysyna tústi.
«Baıqaýǵa qatysýǵa 6 adam iriktelip alynyp, olar bir aıdan astam ýaqyt daıyndaldy. Óz qoldarymen kostıým ázirledi, qazylar alqasyn tań qaldyrý jáne bas júldeni alý úshin bar ónerlerin saldy. Al qazylar alqasynyń quramyna №48 jáne №66 mekeme bastyqtarynyń orynbasarlary, qylmystyq-atqarý júıesiniń ardagerleri jáne departamenttiń mamandary kirdi», - deıdi uıymdastyrýshylar.
Tórtinshi nómirli qatysýshy Gúlbarshyn Serimbetova óziniń erekshe kostıýmimen qazylar alqasyn tań qaldyrdy jáne basqa da saıystardan súrinbeı ótip jeńiske jetti.
Ol ulttyq naqyshtaǵy kóılek, qamzol men sáýkeleni ázirleýge A4 formattaǵy 1200 bet qaǵaz, sıntepon men birneshe metr mata jumsaǵan.
Aıtýynsha, salmaǵy 40 kg bolǵan kostıýmdi ázirleýde symnan onyń negizin jasaý qıynǵa túsken.
Ekinshi kóılegin Gúlbarshyn qaǵazdan qıyp jasalǵan 3 myń kóbelekpen bezendirgen.
«Men maqsatyma jetip, mekeme arýy bolǵanyma óte qýanyshtymyn. Meniń bul mekemegen túskenimen nebári 3 aı ǵana. Qyzdar maǵan qoldaý kórsetip, bılep, tipti plakattar daıyndady. Men mekeme qyzmetkerlerine, ásirese maǵan kómekteskenderdiń barlyǵyna óte rızamyn. Árıne, qıyndyqtar boldy, ásirese kóılektiń qańqasyn jáne tómengi bóligin jasaý kezinde. Sondaı-aq, rekvızıt retinde biz elimizdiń týynda beınelengen bostandyq sımvoly búrkitti jasadyq. Ekinshi kostıýmdi jasaý ońaıyraq boldy, desek te 3 myń kóbelekti qıyp, olarmen kóılek pen aıaq kıimdi tolyq bezendirýge týra keldi», – deıdi baıqaý jeńimpazy.
Gúlbarshynǵa kópten kútken táji tabystaldy, qalǵan qatysýshylar da nazardan tys qalmady jáne ártúrli nomınatsııalar boıynsha marapattaldy.
«Búgingi «Mekeme arýy-2023» is-sharasy adamgershilik-estetıkalyq tárbıe berý, bos ýaqytty paıdamen ótkizý jáne daıyndyq barysynda jazasyn óteýshilerdi biriktirý maqsatynda ótkizildi. Sottalǵandar bir aı boıy daıyndaldy, biz buǵan kýá boldyq. Olardyń árqaısysy qazylar alqasy men shaqyrylǵan qonaqtardy tań qaldyryp, óz áleýetin kórsete aldy», - dedi áıelder kolonııasy bastyǵynyń orynbasary Oksana Vyshar.
