SQO men Qytaı arasyndaǵy syrtqy saýda aınalymy úsh jylda 2,2 ese ósti
PETROPAVL. KAZINFORM – Soltústik Qazaqstan oblysynda Qytaı et qaýymdastyǵynyń delegatsııasy boldy. Kezdesýde ózara tıimdi yntymaqtastyq máseleleri talqylanyp, aýyl sharýashylyǵy ónimderin qaıta óńdeý salasynda birlesken jobalardy júzege asyrý usynyldy.
Bul týraly SQO ákimi Ǵaýez Nurmuhambetov áleýmettik jelidegi paraqshasynda jazdy.
«Et ımporttaýshylar men eksporttaýshylar klýbynyń prezıdenti Ma Gýanshen bastaǵan Qytaı et qaýymdastyǵynyń delegatsııasy keshe Qazaqstan-Qytaı iskerlik keńesiniń VII otyrysyna qatysty. Bul kezdesý ShYU sammıtinde eki memleket basshylarynyń arasyndaǵy kelisimderge qol jetkizý aıasynda ótti.
Aımaqta qazirdiń ózinde «AITsZıÝ» korporatsııasynyń agroónerkásiptik klasterin damytý boıynsha Qazaqstan-Qytaı jobasy sátti júzege asýda – «Taıynsha-Maı» maıly daqyldardy óńdeý zaýyty iske qosyldy. Sondaı-aq «Memolıýks» dıirmeni men qospajem zaýyty salynyp jatyr», - dedi Ǵaýez Nurmuhambetov.
Óńir basshysynyń aıtýynsha, Qytaı delegatsııasy «EMS-Agro» et kombınatynda bolyp, shoshqa keshenin 200 myń basqa deıin keńeıtý jáne et óndirý kólemin 20 myń tonnaǵa jetkizý jobasymen tanysty.
«Jalpy, SQO men Qytaı arasyndaǵy yntymaqtastyq óz jemisin berip jatqanyn aıta ketken jón. Nebári 3 jyldyń ishinde syrtqy saýda aınalymy 2,2 ese ósip, 117 mıllıon AQSh dollaryn qurady.
Sapar qorytyndysy boıynsha Soltústik Qazaqstan men Qytaı arasyndaǵy iskerlik jáne dostyq qarym-qatynas uzaq merzimdi ári jemisti bolatynyna senim bildirdik», - dep jazdy Ǵaýez Nurmuhambetov.
Buǵan deıin Astanada Qytaı Halyq Respýblıkasynyń Tóraǵasy Sı Tszınpınniń Qazaqstanǵa memlekettik sapary aıasynda QR Prezıdentiniń Teleradıokesheni men Qytaı Medıakorporatsııasy (CMG) yntymaqtastyq jáne ózara túsinistik týraly memorandýmǵa qol qoıǵanyn jazǵan edik.
