SQO men astanalyq polıtseıler esirtkige qarsy birlesken operatsııa ótkizdi

PETROPAVL. QazAqparat – Soltústik Qazaqstan oblysy jáne Astana polıtseıleriniń birlesken operatsııasy barysynda zańsyz aınalymnan kelige jýyq sıntetıkalyq esirtki alyndy, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, óńir polıtseıleri esirtki arnasynyń jolyn kesý boıynsha kezekti operatsııany júrgizdi.

Bul joly Petropavldyń 40 jastaǵy turǵyny esirtki qylmysyna qarsy is-qımyl basqarmasynyń jedel ýákilderiniń nazaryna ilikti.

Kúdikti SQO Prokýratýrasynyń úılestirýimen Astana qalasynda jergilikti polıtsııa qyzmetkerlerimen ustaldy.

Qolǵa túsken er adamnyń sómkesinen krıstall tárizdi zat salynǵan eki orama tabyldy.

Saraptama onyń jalpy salmaǵy 199,35 gramm bolatyn α-PvP, ıaǵnı halyq arasynda «tuz» ataýymen belgili sıntetıkalyq preparat ekenin kórsetti, bul óte úlken mólsherge jatady.

Sonymen qatar, elordalyq polıtseıler Astana qalasynda 800 gramnan astam esirtki tárkiledi, osylaısha birlesken operatsııa barysynda 1 kg-nan astam «sıntetıka» tárkilendi.

«Petropavl turǵyny esirtkiniń bul partııasyn elordada satyp alyp, «jasyrylǵan» orynnan alyp ketken. Keıin ony odan ári taratý úshin Petropavlǵa jetkizgen. Bul fakt QR Qylmystyq kodeksiniń 297-babynyń 3-bóligi boıynsha sotqa deıingi tergep-tekserýlerdiń biryńǵaı tiziliminde tirkelgen. Baptyń sanktsııasy 10 jyldan 15 jylǵa deıin bas bostandyǵynan aıyrýdy kózdeıdi. Kúdikti qamaýǵa alyndy», - deıdi SQO PD bastyǵynyń orynbasary Rýslan Nazarov.