SQO men Aqmolada sý tasqyny qaýpi mamyrdyń basyna deıin saqtalady - Qazgıdromet
NUR-SULTAN. QazAqparat - «Qazgıdromet» RMK 18-24 sáýir aralyǵyna arnalǵan gıdrologııalyq boljamyn jarııalady, dep habarlaıdy QazAqparat.
2020 jylǵy 10-17 sáýir aralyǵynda NASA spýtnıkteriniń jerdi qashyqtyqtan zondtaý (JQZ), «Qazgıdromet» RMK óńdelgen sýretteri boıynsha Qazaqstan aýmaǵyndaǵy qar jamylǵan aımaqtar 6%-ǵa qysqarǵan jáne 17 sáýirdegi jaǵdaı boıynsha 3%-dy qurap otyr.
Sondaı-aq, Aqmola oblysynyń ózen basseınderinde jáne Qostanaı oblysynyń ózen basseınderinde topyraqtyń qatý tereńdigi 13-21 sm-ge azaıǵan, al Soltústik Qazaqstan oblysynyń ózen basseınderinde topyraq erigen. Respýblıkanyń jazyq aýmaǵynda jerdegi ylǵal qory joq.
Sınoptıkalyq boljamǵa sáıkes, apta boıy Qazaqstannyń batys jáne soltústik bóliginde aýa raıyn kezekti atlantıkalyq tsıklon anyqtaıdy. Aýa raıy qubylmaly bolady. Naızaǵaı jarqyldap, jańbyr jaýady, shańdy daýyl soǵady, jel kúsheıedi, jekelegen aýdandarda tuman baıqalady. Aptanyń sońyna qaraı Qazaqstan aýmaǵynyń basym bóliginde jańbyr jaýady dep boljanýda.
Elimiz boıynsha aýa temperatýrasynyń kóterilýi jalǵasýda, tek aptanyń sońynda ǵana respýblıkanyń batysy men soltústiginde aýa temperatýrasy tómendeıdi.
Batys Qazaqstan, Aqtóbe, Atyraý, Qostanaı jáne Qaraǵandy oblystarynda kóktemgi sý tasqyny kezeńi ótti, ózenderde sý deńgeıi shamaly aýytqıdy.
Jambyl, Túrkistan, Shyǵys Qazaqstan jáne Almaty oblystarynda jazyq jáne taý bókterindegi aýmaqtarda (1000 m bıiktikke deıin) qar jamylǵysy eridi, al Shyǵys Qazaqstan oblysynyń taýly ózenderinde qar jamylý alańy - 17%.
Aqmola jáne Soltústik Qazaqstan oblystarynda sý tasý kezeńi mamyr aıynyń birinshi onkúndigine deıin jalǵasady.
