SQO men Aqmola oblysynda tasqyn bolǵan aýmaqtarda apattyq-qutqarý jumystary jalǵastyrylýda
ASTANA. QazAqparat - Aqmola jáne Soltústik Qazaqstan oblystarynda tasqyn saldaryn joıý boıynsha jumystar jalǵastyrylyp júrgizlip jatyr. Bul týraly QR ІІM TJ komıtetiniń baspasóz habarlamasynda aıtylady.
Tasqynǵa qarsy sharalar Tselınograd aýdanynyń Orazaq jáne Jańajol aýyldarynda, Shalqar, Qorǵaljyn aýdanynyń Keńbıdaıyq, Uıaly, Qorǵaljyn jáne Órkendeý eldi mekenderinde, Aqmola oblysyndaǵy kúre joldardyń 4 ýchaskesinde jáne Soltústik Qazaqstan oblysynyń Korneevka aýylynda júrgizilip jatyr. Ol úshin 159 adam, 35 tehnıka birligi, 8 sý sorǵylaý qurylǵysy men eki qaıyq jumyldyrylǵan.
Aqmola oblysynyń Orazaq aýylynda sýdy sorǵylaý jumystary jalǵastyrylýda. Tasqyn kezeńiniń bastalýynan beri aýyldyń sý basqan aýmaqtarynan 419 168 tekshe metr sý soryldy. Táýlik boıy kezekshilik júrgizilýde.
Sondaı-aq kezekshilikter Qorǵaljyn, Keńbıdaıyq, Uıaly aýdandarynda da júrgizilýde. Jańajol aýylynda Aqmola oblystyq TJD sý-qutqarý qyzmetiniń kúshimen jergilikti turǵyndardy tasymaldaý uıymdastyryldy. Qutqarýshylar bir kúnde eldi mekenge azyq-túlikter men birinshi qajettiliktegi taýarlardy jetkizý úshin ortasha eseppen alǵanda 35-40 reıs jasaıdy.
Órkendeý jáne Shalqar aýyldaryndaǵy qorǵaý bógetin nyǵaıtý boıynsha birlesken jumystar júrgizilýde. Jalpy alǵanda eldi mekenderge ınerttik materıal salynǵan 16 200 qap tóselip, 2 656 metrdi quraǵan ýaqytsha bógetter quryldy.
Soltústik Qazaqstan oblysyndaǵy Esil aýdanynyń Korneevka aýylynda da jaǵany nyǵaıtý jumystary júrgizilý ústinde. Tarangúl kólindegi sý deńgeıiniń monıtorıngi júrgizilip otyr. Sondaı-aq oblystyq TJD-niń kúshimen Esil ózenindegi sý deńgeıiniń monıtorıngin baqylaý maqsatynda kezekshilik uıymdastyrylǵan.
Tasqyn kezeńiniń bastalýynan beri Astana qalasy, Aqmola, Shyǵys Qazaqstan, Qaraǵandy, Pavlodar, Soltústik Qazaqstan jáne Qostanaı oblystarynda 49 030 metr ýaqytsha bógetter salynyp, 3 221 metr toǵan qalpyna keltirildi, 199 783 ydys-qaptar qoldanylyp, 3 224 319 tekshe metr tasqyn sýy soryldy.
