SQO mektepterinde túski as qymbattady

Soltústik Qazaqstan oblysynyń mektepterinde jańa jyldan bastap túski as quny shamamen 100 teńgege qymbattady. Oqýshylarǵa ystyq tamaq 614 teńgeden satylyp jatyr, dep habarlaıdy Kazinform.

Buǵan deıin oblys ákimimen kezdesýde óńir kásipkerleri mektepterdegi túski as baǵasyn kóterý qajettigin aıtqan edi. Azyq-túliktiń baǵasy qymbattap jatyr. Ári talapqa saı sapaly qyzmet kórsetý úshin túski asty 500 teńgeden satý olarǵa tıimsiz bolǵan.

SQO bilim basqarmasynyń málimetinshe, oblystaǵy 329 mektepke kásipkerler tamaqty jetkizip beredi. 106 bilim ordasynyń shtatynda aspaz bar, taǵy jeti mektep oqýshylaryn jeke kásipkerler men JShS-ler túski aspen qamtyp otyr.

«Óńirdiń 443 mektebinde oqýshylar ystyq tamaqpen qamtylǵan. Balalardyń 37 410-y tegin tamaqtanady, onyń 9 myńnan astamy «Jappaı oqytý» qory arqyly tamaq ishedi. «Jańa oqý jylynan bastap 1-4 synyptyń 26 587 oqýshysy tegin tamaqtanady. Bul maqsatqa jergilikti qazynadan 2024 jylǵa 2,8 mlrd teńge bólindi. Qańtar aıynan bastap mektep ashanalaryndaǵy túski as 614 teńge bolyp bekitildi. Bul — azyq-túliktiń qymbattaýymen baılanysty. Buǵan deıin quny 500 teńge bolǵan edi», — deıdi basqarmanyń baspasóz hatshysy Ásel Orazbaeva.