SQO mektepterinde qandaı mamandar jetispeıdi
PETROPAVL. KAZINFORM — Soltústik Qazaqstan oblysynda 200-den astam pedagogtiń orny bos tur.
SQO bilim basqarmasynyń málimetinshe, qazirgi ýaqytta oblystyń bilim berý salasynda 16 myńǵa jýyq pedagog eńbek etedi. Soǵan qaramastan, óńirde áli de pán ustazdaryna qajettilik bar.
— Matematıka pániniń muǵalimderine suranys joǵary, qazirgi ýaqytta 17 maman qajet. Sonymen qatar 11 ınformatıka muǵalimi, 14 áleýmettik pedagog jáne 12 psıholog kerek. Bos jumys oryndaryn tolyqtyrý maqsatynda mamandardy tartý jumystary júrgiziledi. Qazirgi ýaqytta tıisti konkýrstar uıymdastyrylyp jatyr. Barlyq bos jumys oryndaryn jabý josparlanǵan, — deıdi basqarma mamandary.
Sonymen qatar bilim berý uıymdarynyń bilikti basshylar korpýsyn qalyptastyrý jumysy da jalǵasqan. Ótken bir jyl ishinde mektepter men bilim berý uıymdarynyń basshylyǵyna qatysty bos oryndar sany 57-den 31-ge deıin azaıǵan.
Buǵan deıin Qazaqstandaǵy mektepterge áli de 5 myńnan astam muǵalim qajet ekenin jazǵan edik.
