SQO mektepterinde býllıngtiń aldyn alýǵa baǵyttalǵan beınekameralardyń sany artty
PETROPAVL. KAZINFORM — Soltústik Qazaqstan oblysynda jasandy ıntellekti bar baqylaý júıesi 44 bilim berý mekemesinde jumys istep tur.
Solardyń biri — Esil aýdanyndaǵy Aıaǵan Shájimbaev atyndaǵy № 3 orta mektep. Byltyr elimizdiń 100 úzdik mektebi qataryna engen bilim ordasynda balalardyń qaýipsizdigi birinshi orynǵa qoıylǵan.
— Balalardyń qaýipsizdigi úshin aqparattyq baǵdarlamalyq keshen alǵashqylardyń biri bolyp bizdiń mektepke 2023 jyly ornatyldy. Ereksheligi — balalar bet álpeti arqyly da, saýsaǵynyń izimen de jáne kartamen de kire beredi. Bógde adam kelse de, kamera jazyp alyp, jazba bir apta saqtalady. Tek bazada bar adamdar ǵana ishke kire alady, — deıdi mektep dırektory Aıdar Suraǵanov.
Úsh deńgeıli apparattyq keshendegi jasandy ıntellekt balanyń kóńil kúıin de qalt jibermeıdi.
— Bala mektepke qandaı kóńil kúımen keldi, keterde jaǵdaıy qandaı boldy — bárine analız jasap, bir aptadan keıin bizdiń áleýmettik ustazdarǵa aqparat beredi. Nege bala, mysaly mektepten kóńilsiz ketti degendeı. Odan keıin ata-analarmen, ustazdarmen ári qaraı jumys isteımiz, — deıdi Aıdar Suraǵanov.
Osydan birer jyl buryn aýyl mektebi «Qazaqstan halqyna» qoǵamdyq qory arqyly tolyq zamanaýı qural-jabdyqtarmen qaıta jaraqtandyryldy. Qazir mektepte 86 beınekamera jumys istese, sonyń 43-i tikeleı Jedel basqarý ortalyǵyna qosylǵan.
— Jasandy ıntellekti bar 43 beınekamera bazaǵa júktelgen adamnyń segiz túrli emotsııasyn anyqtaı alady. Sonyń ishinde agressıvti minez-qulyqty, tóbelesti, býllıngti anyqtaý boıynsha jumys atqarady. Balalardyń qandaı da bolmasyn is-áreketteri telegramdaǵy bizdiń kanalǵa túsedi, — deıdi Aıdar Suraǵanov.
SQO Bilim basqarmasynyń málimetinshe, bilim berý uıymdarynda qaýipsizdikti qamtamasyz etý maqsatynda zamanaýı tehnologııalar keńinen qoldanylyp keledi. Qazirgi ýaqytta jasandy ıntellekt júıeleri óńirdegi 44 bilim berý uıymyna engizilgen.
Sonyń ishinde Petropavlda «PROTECTOR AI» júıesi 36 mektep pen bir balabaqshada jumys isteıdi. Sonymen qatar Esil aýdanyndaǵy eki mektepte, Ýálıhanov, Mamlıýt aýdandaryndaǵy bir-bir mektepte atalǵan júıe engizilgen.
Al Shal aqyn aýdanyndaǵy úsh mektepte «Qazaq Bilim» baǵdarlamalyq júıesi qoldanylady. Jańa oqý jylynan bastap Aıyrtaý aýdanyndaǵy úsh mektepte de iske qosylady.
Mamandardyń aıtýynsha, óńirdegi bilim berý nysandarynyń barlyǵy beınebaqylaý júıesimen 100% qamtylǵan. Qazirgi tańda oblys boıynsha 15 667 beınebaqylaý kamerasy bilim berý mekemelerine ornatylǵan. Onyń 5,5 myńy syrtqy baqylaýǵa, 10, 1 myńy ǵımarat ishindegi baqylaýǵa arnalǵan.
Ornatylǵan kameralardyń 10,5 myńy tsıfrlyq, qalǵany analogtyq júıege jatady.
Buǵan deıin ІІM balalar qaýipsizdigine qatysty ata-analarǵa úndeý jasaǵanyn jazǵan edik.
