SQO mektepterinde kámeletke tolmaǵandar isi jónindegi ınspektorlar jetispeıdi
Petropavlda «Nur Otan» partııasy SQO fılıaly janynan bilim jáne ǵylymdy damytý boıynsha qurylǵan qoǵamdyq keńestiń otyrysy ótti. Oblystyq bilim salasynda sapany qamtamasyz etý departamentiniń basshysy Aınagúl Suraǵanovanyń aıtýynsha, Bilim jáne ǵylym mınıstriniń tapsyrmasyna oraı oblystyń memlekettik orta, tehnıkalyq, kásibı bilim berý mekemelerine monıtorıng júrgizilip, qaýipsizdiktiń saqtalýy tekserildi.
SQO-da 462 mektep bar, onyń 106-sy tolyq, 356-sy shaǵyn komplektili memlekettik bilim berý mekemeleri. 18-i tehnıkalyq jáne kásibı bilim berý uıymdary.
«Monıtorıng barlyq mektep-kolledjderde beınekameralardyń barlyǵyn kórsetti. Alaıda 462 mekteptiń 390-y mamandandyrylǵan kúzetpen qamtylmaǵan. 395 mektepte kámeletke tolmaǵandar isi jónindegi ınspektorlar joq. Maǵjan Jumabaev aýdanynda úsh ınspektor 41 mektepke qyzmet kórsetedi. 212 mektepte dabyl túımesi joq. Al Aqjar aýdanynyń 24 mektebinde balalardyń qaýipsizdigine jaýapty tulǵa bekitilmegen», - deıdi Aınagúl Suraǵanova.
Kolledjderde de olqylyqtar anyqtaldy.
«Oblysta 18 kolledj bolsa, sonyń 13-inde mamandandyrylǵan kúzet qyzmeti joq. 8 kolledj kámeletke tolmaǵandar isi jónindegi ınspektorlarmen qamtylmaǵan. 11 kolledjde týrnıketter qoıylmaǵan. Al bir oqý ornynda bógde adamdardyń kolledjge kedergisiz kirýine shekteý qoıylmaǵan», - deıdi departament basshysy.
