SQO: mektep oqýshylaryn tasymaldaýda keı avtobýs júrgizýshileri talaptardy saqtamaǵan

PETROPAVL. KAZINFORM – Soltústik Qazaqstan oblysynyń prokýrorlary balalardy tasymaldaý kezinde qaýipsizdik talaptarynyń buzylǵandyǵyn anyqtady. Júrgizilgen jumys nátıjesinde 1632 oqýshynyń quqyǵy qorǵaldy.

Qadaǵalaýshy organnyń málimetinshe, prokýrorlar oblystyń bilim mekemelerine tekseris júrgizdi. Aıyrtaý jáne Ýálıhanov aýdandarynda mektep avtobýstarynyń júrgizýshileri Jolaýshylardy avtomobıl kóligimen tasymaldaý erejesiniń 107, 108 tarmaqtaryn buza otyryp, jolǵa shyǵý aldynda medıtsınalyq tekserýden ótpeı, 372 balany tasymaldaǵan.

M.Jumabaev jáne Aqqaıyń aýdandarynyń bilim berý uıymdarynda kólik quraldaryna tehnıkalyq qyzmet kórsetý týraly kelisimder jasalmaǵan. Sondaı-aq avtobýs júrgizýshileri alkogoldik jáne esirtkilik zattardy paıdalanýdy anyqtaý boıynsha medıtsınalyq tekserýden ótpegen.

Aqqaıyń aýdanynda 4 bilim berý mekemesiniń oqýshylar avtobýstarynda alǵashqy medıtsınalyq kómek qobdıshasy jáne apattyq belgisi bolmaǵan.

Prokýrorlardyń aktileri boıynsha kináli laýazymdy adamdar zańda belgilengen jaýapkershilikke tartyldy, zańbuzýshylyqtar joıyldy.

Buǵan deıin elimizde bıyl 3,8 mln bala oqý jylyn aıaqtaıtynyn aıtqan edik.