SQO mektebinde oqýshy baltamen jaraqattaǵan balalardyń qazirgi jaǵdaıy qalaı

PETROPAVL. QazAqparat – Soltústik Qazaqstan oblysy densaýlyq saqtaý basqarmasy 9-synyp oqýshysynyń qolynan zardap shekken balalardyń qazirgi jaǵdaıy týraly aqparat taratty, dep habarlaıdy QazAqparat tilshisi.

SQO densaýlyq saqtaý basqarmasynyń málimetinshe, aýyr jaraqat alyp, jansaqtaý bólimine túsken eki bala búgin jaraqat bólimshesine aýystyryldy.

«Qazir balalardyń jaǵdaıy ortasha aýyr, birqalypty. Hal-jaǵdaılary da turaqty, esin biledi, suraqtarǵa jaýap berip jatyr. Júıelik organdar boıynsha erekshelikter joq. Gemodınamıka turaqty. Emdeý dıagnostıka jáne emdeý hattamasyna sáıkes júrgizilip jatyr. Balalar travmatolog, nevropatolog jáne neırohırýrgtyń baqylaýynda», - delingen habarlamada.

Esterińizge salaıyq, Petropavldaǵy №4 mekteptiń 9-synyp oqýshysy sabaqqa balta-pyshaqpen qarýlanyp kelip, úsh balany jaraqattaǵan edi.

Balalardyń birine emdeý mekemesinde kómek kórsetilip, keıin ambýlatorlyq em alýǵa úıine jiberildi. Aýyr jaraqat alǵan eki balaǵa shuǵyl túrde ota jasalyp, jansaqtaý bólimine jatqyzyldy.

Buǵan deıin Petropavlda jumys tobynyń qurylǵanyn aıtqan edik. Komıssııa mektepterdiń qaýipsizdik quraldarymen qanshalyqty qamtylǵanyn tekseredi.

Búginde óńirde 465 mektep bolsa, sonyń barlyǵy 12 myń beınekameramen qamtylǵan.

Alaıda erejege saı bolýy tıis týrnıketter men mamandandyrylǵan kúzet bilim ordalarynyń tek jartysynda ǵana bar.