SQO medıtsına qyzmetkerleriniń 33 paıyzy koronavırýs vaktsınasyn saldyrdy
PETROPAVL. QazAqparat – Soltústik Qazaqstan oblysynda ótken táýlikte 17 adamnan koronavırýs ınfektsııasy anyqtaldy. Aýyrǵandar 7 aýdanda jáne Petropavlda tirkeldi, dep habarlaıdy QazAqparat tilshisi.
Soltústik Qazaqstan koronavırýs ınfektsııasynyń taralýy boıynsha «jasyl aımaqta».
Óńirde kúnde orta eseppen 15-17 adamnan anyqtalady. Bul árıne shilde, qarasha aıynda aýyrǵandar sanymen salystyrǵanda az.
Jedel járdem qyzmeti sol ýaqytta táýligine 660 shaqyrtýǵa deıin baryp júrdi. Qazirgi oblystaǵy jaǵdaı da kez-kelgen ýaqytta ózgerýi múmkin.
«Elimizdiń birneshe óńiri «qyzyl aımaqqa» kirdi. Aýyrǵandar sany kóbeıip keledi. Bizdiń oblysta jaǵdaı turaqty. Osy kórsetkishti saqtap qalý úshin maska taǵyp, qolymyzdy jıi jýyp, adam kóp shoǵyrlanǵan jerlerge barýdan bas tartý qajet. Qaýipti vırýsty juqtyrmaý óz qolymyzda. Ózimizdiń, jaqyndarymyzdyń densaýlyǵyna jaýapkershilikpen qaraıyq», - deıdi oblystyq kópbeıindi aýrýhana bas dárigeriniń orynbasary Rýslan Abetov.
SQO-da ótken táýlikte 17 adamda COVID-19 anyqtaldy. Onyń 7-ýi Petropavl, qalǵan 10-y - jeti aýdannyń turǵyny. Jalpy juqtyrǵandar sany 13 086-ǵa jetti.
Rýslan Abetovtyń aıtýynsha, koronavırýspen kúresýdiń taǵy bir tıimdi joly - oǵan qarsy vaktsına alý.
Dáriger aqpan aıynda alǵashqy lekpen ekpe alǵandardyń biri. Jalpy óńirde 7 myńǵa jýyq medıtsına qyzmetkeri bar bolsa, sonyń 33% vaktsınatsııalanǵan.
«Vaktsınanyń birinshi komponentin alǵanda alǵashqy kúni azdap álsizdik boldy. Ekinshi komponentin alǵanda ózimde esh ózgeristi baıqamadym. Koronavırýsqa qarsy ekpe alýdan qorqýdyń qajeti joq. Onyń tek paıdasy ǵana bar. Osy kúnge deıin bizdiń aýrýhananyń 152 qyzmetkeri «Spýtnık V» vaktsınasyn qoıdyrdy. Barlyǵynyń jaǵdaıy jaqsy», - deıdi dáriger.
SQO sanıtarııalyq-epıdemıologııalyq baqylaý departamenti baspasóz qyzmetiniń málimetinshe, óńirde 4712 adam koronavırýsqa qarsy vaktsınanyń birinshi komponentin alsa, 2118 adam ekpeni tolyq aldy.
