SQO metsenattary bir ǵana aýdandy kórkeıtýge 163,5 mln teńge baǵyttady
SQO Aýyl sharýashylyǵy basqarmasynyń málimetinshe, óńirdegi 635 eldi mekende 5496 agroqurylym jumys isteıdi. Olardyń 544-i, ıaǵnı shamamen 10% turyp jatqan aýyldaryn kórkeıtýge at salysýda.
Metsenattardyń basym bóligi Esil aýdanynda turady. Máselen «Zagradovskoe» JShS Zagradovka eldi mekeninde 10 mln teńgege feldsherlik-akýsherlik pýnktti jóndedi. 35 mln teńgege mádenıet úıine kúrdeli jóndeý júrgizip, aınalasyna 5 mln teńgege túrli aǵash kóshetterin otyrǵyzdy. Budan basqa 25 mln teńgege turǵyn úıdiń qurylysy júrip jatyr. Sharýashylyq jumysshylarynyń ortasha eńbekaqysy byltyr 122 myń teńgeden 138 myń teńgege jetti.
Osy eldi mekendegi taǵy bir sharýashylyq - «Prometeı – Agro» JShS otbasylyq demalys ortalyǵyn saldy. Munda jaıly dámhana, balalardyń oıyn bólmesi, bılıard, sulýlyq salony jáne qonaqúı jumys isteıdi. Mektepti de kórkem ádebıetpen qamtyp otyr.
Korneevka eldi mekenindegi «Marııa sela Korneevka» JShS malshylar úıin salyp berse, «Agro profıýjen SV» JShS mádenıet úıin jóndedi.
Ilınka eldi mekenindegi «Ilınskoe» JShS-niń jetekshisi de áriptesterinen qalmaı, týǵan aýyldyń órkendeýine óz úlesin qosyp keledi. Jyl saıyn aýyldyq okrýgtiń áleýmettik máselelerin sheshýge 30 mln teńge bóledi. Byltyr bul qarajatqa asfalt tóselip, baspanalar salyndy. «Ilınskoe Agro» JShS de jumysshylaryna turǵyn úı salyp jatyr.
Torańǵul aýyldyq okrýginde eki sharýashylyq - «Atameken-Agro Esıl» jáne «Azııa Tarangýl» JShS jumys isteıdi. Birinshisi Dvınsk aýylyndaǵy joldy jóndep berse, ekinshisi jergilikti feldsherlik-akýsherlik pýnktti jóndeýden ótkizdi, mádenıet úıindegi shyǵarmashylyq ujymdardy kerek-jaraqpen qamtamasyz etip, Torańǵul aýylynda eki úı saldy.
Bul aýdandaǵy 53 eldi mekende 109 kásipker isin dóńgeletken. Solardyń 30 % byltyr 163,5 mln teńgege demeýshilik jasady.
