SQO MÁMS-ti engizýge tehnıkalyq turǵydan tolyq daıyn
PETROPAVL. QazAqparat – Soltústik Qazaqstan oblysy densaýlyq saqtaý salasyna jańa júıeni engizý úshin 100% kompıýterlik tehnıkamen jabdyqtaldy.
Óńir jańa jyldan bastap júzege asatyn mindetti medıtsınalyq saqtandyrýǵa tehnıkalyq jaǵynan tolyq daıyn, dep habarlaıdy QazAqparat tilshisi.
«Áleýmettik medıtsınalyq saqtandyrý qory» KEAQ SQO fılıaly baspasóz qyzmetiniń málimeti boıynsha, óńirde tegin medıtsınalyq kómektiń kepildik berilgen kólemi sheńberinde bıyl 53 medıtsınalyq uıym qyzmet kórsetedi, onyń 23-i jeke menshik. Osy jyly jasalǵan sharttardyń somasy 32 mlrd teńgeden asady. Áleýmettik medıtsınalyq saqtandyrý qory oblystyń medıtsına uıymdaryna halyqqa kórsetken qyzmeti úshin 26 mlrd-tan astam teńge tóledi, bul medıtsınalyq kómek kórsetýge jasalǵan sharttar somasynyń 84%.
SQO ákimi Qumar Aqsaqalovtyń sózine qaraǵanda, óńir medıtsınalyq saqtandyrýdy engizýge tehnıkalyq turǵydan tolyq daıyn.
«MÁMS engizýge tehnıkalyq daıyndyq 100% quraıdy. Barlyq oblystyq, qalalyq emhanalar, aýdandyq emdeý mekemeleri kompıýterlik tehnıkamen jabdyqtaldy. Barlyq medıtsınalyq uıymdar »Saqtandyry« aqparattyq júıesine qosyldy, sondaı-aq QR Densaýlyq saqtaý mınıstrliginiń aqparattyq júıeleri engizildi, - dedi Qumar Aqsaqalov.
»Áleýmettik medıtsınalyq saqtandyrý qory« KEAQ Basqarma tóraǵasy Aıbatyr Jumaǵulovtyń málimetine qaraǵanda, oblys boıynsha medıtsınalyq saqtandyrý qoryna 5 mlrd-tan astam teńge jarnalary men aýdarymdar túsken. Bul qarajat 166 myń jaldamaly qyzmetker úshin salynǵan. Óńirde medıtsınalyq kómekpen qamtý 87% quraıdy jáne oblys halqynyń 13% nemese shamamen 75 myń adam »shartty túrde saqtandyrylmaǵan« bolyp esepteledi.
