SQO: Mamlıýtka qalasynda «Parasat joly» ortalyǵy ashyldy

PETROPAVL. QazAqparat – Soltústik Qazaqstan oblysynyń Mamlıýtka qalasynda sybaılas jemqorlyqqa qarsy mádenıetti qalyptastyrýdy maqsat etken «Parasat joly» ortalyǵy ashyldy, dep habarlaıdy QazAqparat tilshisi.

SQO sybaılas jemqorlyqqa qarsy qyzmettiń málimetinshe, «Parasat joly» ortalyǵy Mamlıýtka qalasynyń kitaphanasynda ornalasqan. Qazir óńirde osyndaı 15 ortalyq bolsa, sonyń 13-i aýdan ortalyqtarynda jumys istep jatyr.

Jańa ortalyqtyń ashylýyna SQO boıynsha sybaılas jemqorlyqqa qarsy is-qımyl departamentiniń basshysy Jarqyn Ǵalymov jáne aýdannyń zııaly qaýymy qatysty.

«Bul ortalyq ár adamǵa qoljetimdi, sybaılas jemqorlyqqa qarsy is-sharalardy ázirlep, ótkizýge bolatyn ashyq alańǵa aınalady. Sondaı-aq, «Qyzyljar – adaldyq alańy» jobasy aıasynda munda sybaılas jemqorlyqqa qarsy mádenıetti qalyptastyrý boıynsha aqparattyq, profılaktıkalyq jumystar júrgiziledi», - deıdi Jarqyn Ǵalymov.

Departament basshysy Jarqyn Ǵalymov «Ashyq ákimdik» front-keńsesinde azamattardy jeke qabyldady. Halyqqa qyzmet kórsetý ortalyǵynyń fılıalyna bardy. Aýdan aktıvimen kezdesti.

«Mamlıýt aýdanyna byltyr memlekettik áleýmettik tapsyrys aıasynda sybaılas jemqorlyqqa qarsy is-sharalar ótkizýge 140 myń teńge bólindi. Alaıda barlyq bólingen qarajat bir semınar ótkizýge jumsaldy. Mundaı semınarlardy departament qyzmetkerleri tegin jáne turaqty negizde ótkizetinin eskere otyryp, bul maqsatqa qosymsha qarajat bólýdi orynsyz dep sanaımyn», - deıdi sybaılas jemqorlyqqa qarsy qyzmettiń jetekshisi.

Jıyn barysynda aýdan ákimine «Qyzyljar – adaldyq alańy» jobasyna jaýapty tulǵany qaıta qaraý usynyldy.

«Joba tujyrymdamasy boıynsha bul belsendi azamattyq ustanymy bar qoǵamdyq jumystarǵa jaqyn tulǵa bolýy tıis. Qazirgi ýaqytta jobany júzege asyrý memlekettik quqyq bóliminiń mamanyna júktelgen», - dedi Jarqyn Ǵalymov.