SQO-lyq ardagerler Reseıge topyraq salynǵan kapsýla alyp ketti
Soltústik Qazaqstannyń topyraǵy salynǵan metall kapsýla Lenıngrad oblysy Kıngısepp qalasyndaǵy granıt eskertkishtiń irgetasyna salynady. Sol jerde 6-mamyr nemis-fashıstik basqynshylardan Kıngısepp qalasyn azat etýdiń 75 jyldyǵyna oraı saltanatty is-shara ótedi.
SQO Polıtsııa departamenti baspasóz qyzmetiniń habarlaýynsha, jaýyngerlerdi eske alý jáne qurmet kórsetý maqsatynda ázirlengen kapsýlany reseılikterge tabys etý qurmeti SQO ishki ister organdarynyń eki ardagerine buıyrdy. Áskerı qyzmetshiler búgin Petropavldaǵy 314-shi atqyshtar dıvızııasyna arnalǵan eskertkish janynda kapsýlany saltanatty jaǵdaıda otstavkadaǵy polkovnıkter Aqan Syzdyqov pen Evgenıı Raıtenbahqa tabystady.
Eskertkish janynda mektep oqýshylary, ishki ister organdary jáne basqa da vedomstvolardyń ardagerleri, sondaı-aq atalary men ákeleri surapyl soǵysqa qatysqan jandar jınalǵan mıtıng ótti.
«41-shi jyldyń tamyzynda Petropavlda Ekinshi d.nıejúzilik soǵys tarıhynda erekshe iz qaldyrǵan 314-shi atqyshtar dıvızııasy quryldy. Búgin bizge batyrlarymyzdy qurmetpen eske alý úshin jerlesterimiz erlikpen qorǵaǵan qalaǵa jol tartýdyń sáti tústi. Biz qasıetti mıssııany abyroımen atqarýǵa sóz beremiz», - dedi Ákimshilik polıtsııa basqarmasynyń ardagerler keńesiniń tóraǵasy Evgenıı Raıtenbah.
Jınalǵandar monýmentke gúl shoqtaryn qoıyp, Ekinshi dúnıejúzilik soǵys jyldarynda beıbitshilik úshin soǵysqan jaýyngerlerdi bir mınýt únsizdikpen eske aldy.
