SQO-lyq donor úsh patsıenttiń ómirin saqtap qaldy
PETROPAVL. KAZINFORM - Soltústik Qazaqstan oblysynda Densaýlyq saqtaý mınıstrliginiń Transplantattaý jáne joǵary tehnologııalyq medıtsınalyq qyzmetterdi úılestirý jónindegi respýblıkalyq ortalyǵynyń úılestirýimen donorlyq protsess júrgizildi.
Kópbeıindi qalalyq jedel medıtsınalyq járdem aýrýhanasyna 1961 jyly týǵan er adam jedel mı qan aınalymynyń buzylýymen jetkizildi. Júrgizilgen reanımatsııalyq is-sharalarǵa qaramastan, dárigerler mıynyń ólimin tirkedi.
Túsindirý jumystary júrgizilgennen keıin týystary qaıtys bolǵannan keıingi donorlyqqa kelisim berdi. Transplantattaý komandalary men sanıtarııalyq avıatsııanyń qatysýymen aǵzalar alynyp, olardyń arqasynda uzaq ýaqyt boıy respýblıkalyq kútý paraǵynda turǵan patsıentterge transplantattaý kómegi kórsetildi.
Baýyr 51 jastaǵy baýyr tsırrozymen aýyratyn er adamǵa transplantattaldy. Sondaı-aq dıabettik nefropatııa aıasynda damyǵan V satydaǵy sozylmaly búırek aýrýy bar patsıentterge eki búırek: 1986 jyly týǵan áıelge jáne 2020 jyldan beri baǵdarlamalyq gemodıalızde júrgen 1978 jyly týǵan er adamǵa transplantattaldy.
Densaýlyq saqtaý mınıstrligi málimetinshe, búginde Qazaqstanda transplantattaýdy kútý paraǵyndaó 4,5 myńnan astam patsıent bar, olardyń edáýir bóligi búırek, baýyr jáne júrek transplantattaýyn qajet etedi. Tek ótken jyldyń ózinde qaıtys bolǵannan keıingi donorlardan 18 donorlyq protsess júrgizilip, ómirlik mańyzdy aǵzalardy transplantattaý boıynsha 68 operatsııa jasaldy.
Soǵan qaramastan jyl saıyn júzdegen patsıent óz kezegine jete almaı ómirden ótedi. Densaýlyq saqtaý mınıstrligi donordyń otbasyna shynaıy alǵysyn bildiredi. Qaıǵy-qasirettiń aýyr sátinde olar basqa adamdardyń ómirin saqtap qalýǵa múmkindik bergen sheshim qabyldady.
Dál osyndaı qadamdar donorlyq mádenıetin qalyptastyryp, búgin transplantattaýdy kútip otyrǵan adamdarǵa úmit syılaıdy.
Qazaqstanda máıittik donor bolýdyń reti men zańdy tetikteri qandaı? Osy oraıda Kazinform tilshisi BQO boıynsha transplantattaý jónindegi óńirlik úılestirýshi Indıra Semenovaǵa birneshe saýal qoıǵan edi.