SQO: Qylmystyq atqarý júıesiniń qyzmetkerleri provızorlyq ortalyqqa kómek kórsetti
SQO QAJD baspasóz qyzmetiniń málimetinshe, departament ujymy qaıyrymdylyq kómek kórsetpes buryn habarlasyp, ne qajet ekenin bilgen. Olar M.Qozybaev atyndaǵy Soltústik Qazaqstan ýnıversıtetiniń birinshi jataqhanasynda 6 shilde kúni ashylǵan provızorlyq statsıonardy tańdaǵan. 200 orynǵa shaqtalǵan ortalyqta qazir 120 adam em alyp jatyr. Statsıonarda 17 medıtsına qyzmetkeri jumys isteýde.
«Bizge habarlasyp, ne kerek, ne ákeleıik dep surap jatqandar kóp. Bul jańadan ashylǵan statsıonar bolǵandyqtan, aýrýhana sııaqty emes. Jaǵdaı tolyǵymen jasalmaǵan», - deıdi SQO kópsalaly aýrýhananyń bas meıirbıkesi Irına Zaınýtdınova.
QAJD ujymy shamamen 700 myń teńge jınap, provızorlyq statsıonarǵa aýyz sý, shaı, kofe, bir rettik ydys, azyq-túlik, súlgi men elektr sháınekterin, sondaı-aq gıgıena quraldaryn jetkizdi.
«Medıtsına qyzmetkerleri táýligine 24 saǵat boıy demalyssyz jumys istep, aýyrǵan turǵyndardy aıaqqa turǵyzý úshin qoldan kelgenniń bárin jasap jatyr. Bizdiń ujym osyndaı qıyn sátte olarǵa kómektesemiz dep sheshim qabyldap, aldyn ala qajetti zattar tizimin surap aldyq. Bul aktsııamyz bir rettik emes, alda da kómektesemiz», - deıdi SQO boıynsha QAJD bastyǵynyń orynbasary Aleksandr Kochkın.
Osyndaı qaıyrymdylyq kómekti oblystyń QAJD qaraıtyn barlyq mekemeleri, sondaı-aq probatsııa qyzmetiniń aýdandyq bólimderiniń ınspektorlary kórsetti. Muqtaj otbasylar men probatsııa qyzmetiniń esebinde turǵan sottalǵandarǵa jeke qorǵanys quraldary, antıseptıkter, maskalar, sondaı-aq birinshi qajettilik buıymdary taratyldy.
