SQO qutqarýshylary tasqyn sýdy aýyldarǵa kirgizbes úshin jumyla áreket etýde
PETROPAVL. QazAqparat - SQO-da tasqyn sý máselesi ózektiligin joıǵan joq. Taıynsha aýdanyndaǵy Shaǵalaly ózeninde muz keptelisi týyndap, saldarynan Taıynsha qalasyn sý basý qaýpi týdy. Alaıda, qutqarýshylardyń jedel is-qımylynyń nátıjesinde qater seıildi, dep habarlaıdy QazAqparat tilshisi.
SQO Tótenshe jaǵdaılar departamenti mamandarynyń málimetinshe, búgingi tańda oblystyq jáne aýdandyq mańyzdaǵy joldardyń 9 ýchaskesin sý shaıǵan. Sáýirdiń 4 kúni Taıynsha aýdanyndaǵy Shaǵalaly ózeninen qaýip tóndi. Qopa kólinen kelgen aǵyn sý saldarynan muz keptelisi týyp, ózen óz arnasynan shyqty. Jaıylǵan sý Taıynsha qalasyna jetken.
«Jedel túrde arnaıy tehnıkany jáne órt sóndirý-sorǵy stansasyn jetkizdik. Qosymsha or qazylyp, bul kelgen sýdy ishki kirgizbedi. Qazir jaǵdaı qalypqa keldi. Sý deńgeıi túsip jatyr. Kelgen sý úılerden 150-200 metrge ketti», - deıdi SQO TJD bastyǵy Ramıl Kamalov.
Qazir Shaǵalaly ózeniniń ańǵarynda ornalasqan Teńdik jáne Kantemırovskoe eldimekenderdi qutqarýshylar nazarda ustap otyr. Muz keptelisi týyndamaýy úshin muz kesilip jatyr. Buǵan deıin Ýálıhanov aýdanyndaǵy eki aýyl turǵyndary tasqyn sý saldarynan kóshirilse, búginde qaýip seıilip, olar úılerine oraldy.
Qazir Aıyrtaý jáne Ǵ.Músirepov aýdandaryndaǵy shaǵyn ózenderdiń deńgeıi birshama kóterilgen. Aǵyn sý Esil ózenine bet aldy.
«Aqmola oblysynan sý kelýi tıis. Jabaı ózeni boıynsha habarlama keldi. Sergeev sý qoımasyndaǵy sý deńgeıi búginde 841 sm jetti, asyp tógilgen sýdyń deńgeıi 41 sm. Sergeev sý qoımasyndaǵy sý Petropavl qalasyna 10-14 kún aralyǵynda kele bastaıdy», - «Qazgıdromet» RMK SQOF dırektory Qymbat Merǵalımova.
SQO Tótenshe jaǵdaı departamenti mamandarynyń aıtýynsha, M. Jumabaev aýdanyndaǵy Benıash, Vozvyshenko jáne Alýa aýyldaryna sý kirgizbeý úshin qutqarýshylar jumyldyrylǵan. Qyzyljar aýdanyndaǵy Beskól men Báıterek aýyldarynyń mańynda da birneshe kúnnen beri sý sorý jumystary júrgizilip jatyr.
