SQO qutqarýshylary sýǵa ketken turǵyndy 5 táýlikten beri izdep jatyr
PETROPAVL. QazAqparat – Soltústik Qazaqstan oblysynda balyq aýlaýǵa shyqqan turǵyn sýǵa batyp ketti, denesi áli tabylǵan joq, dep habarlaıdy QazAqparat tilshisi.
SQO Tótenshe jaǵdaılar departamenti baspasóz qyzmetiniń málimetinshe, oqys oqıǵa 6 mamyr kúni bolǵan. Qutqarýshylar sol kúni saǵat 20.30-da Tımırıazev aýdanynyń 1971 jyly týǵan turǵynyn izdeýdi bastady.
Aldyn ala boljam boıynsha er adam Tımırıazevten 3 shaqyrymdaı jerdegi Álpash kóline balyq aýlaýǵa baryp, sýǵa ketken. Sý qoımasynyń janynan onyń kıimi tabyldy.
Qazir oqıǵa ornynda 5 qutqarýshy, bir tehnıka jáne júzý quraly jumys istep jatyr. Ázirshe izdeý esh nátıje bergen joq.
