SQO qutqarýshylary majarstandyq saıahatshyǵa kómek kórsetti
PETROPAVL. QazAqparat - Býdapeshten shyǵyp, Magadanǵa jol tartqan majarstandyq baıker ıAnosh Garajskıge SQO qutqarýshylary kómek kórsetti, dep habarlaıdy QazAqparat tilshisi.
Myńdaǵan shaqyrymdy artqa qaldyrǵan majarstandyq saıahatshy ıAnosh Garajskıge Soltústik Qazaqstan jerinde ýaqytsha aıaldaýǵa týra keldi. Ushqan tas baıkerdiń mototsıkliniń maı súzgisin tesip jiberipti. SQO TJD baspasóz qyzmetiniń habarlaýynsha, keshqurym Taıynsha aýdany Chkalov aýylynyń mańynda «Kókshetaý - Omby» avtojolynyń boıynda turǵan jolaýshyny ótip bara jatqan qutqarýshylar kórip qalady.
«Jol ústinde turǵan qara bylǵarydan kıingen jolaýshyny baıqap, birden toqtadyq. Ózimizdi tanystyrdyq. Ol - oryssha, biz aǵylshynsha durys bilmeımiz. Ymmen, bar bilgenimizdi aralastyryp ne bolǵanyn suradyq. Onyń ózimen birge qosalqy maı súzgisi bar eken. Servıstik ortalyqqa aparý alys bolǵandyqtan, sol jerde aýystyryp berdik», - deıdi SQO TJD daǵdarystyq jaǵdaılar basqarmasynyń bastyǵy Rústem Jumaǵalıev.
Taıynshaǵa birge kelgen saıahatshyny № 17 órt sóndirý bólimi qonaqjaılylyqpen qarsy alyp, tamaqtandyryp, keıin qonaq úıge ornalasýyna kómektesedi. Al kezekshi qaraýyl mototsıkldi tehnıkalyq baıqaýdan ótkizip, jolǵa daıyndap berdi.
Tańerteń ıAnosh, barlyǵymen jyly qoshtasyp, Petropavlǵa bet aldy.
«Bul biz úshin esten ketpes kezdesý boldy. Adamdar bir-birine qıyn jaǵdaıda kómektesýi kerek. Bir qyzyǵy biz saıahatshyǵa Vengrııanyń Ulttyq merekesi - Otan qorǵaýshylar men áskerıler kúni kómektesippiz. Endi ıAnosh mereke saıyn osy oqıǵany eske alary sózsiz», - deıdi SQO TJD daǵdarystyq jaǵdaılar basqarmasy bastyǵynyń orynbasary Serik Naýryzbaev.
