SQO: quny 7,1 mlrd teńge bolatyn 20 memlekettik satyp alý toqtatyldy

PETROPAVL. KAZINFORM – Soltústik Qazaqstan oblysynyń prokýrorlary bıýdjet qarajatyn utymdy paıdalanýdy taldaý aıasynda memlekettik satyp alý týraly zańnamany óreskel buzý faktilerin anyqtady.

SQO prokýratýrasynyń málimetinshe, Petropavl qalasynyń turǵyn úı-kommýnaldyq sharýashylyq bóliminiń laýazymdy tulǵalary zań talaptaryn buza otyryp, 3,6 mlrd teńgeniń memlekettik satyp alýyn júrgizgen. Qujatta mekenjaılar, atqarylatyn jumystyń kólemi kórsetilmegen.

Shal aqyn aýdanynyń ekonomıka jáne qarjy bólimi zań talaptaryna qaıshy, mekenjaı men jumys kólemin kórsetpeı aýlalardy asfalttaý boıynsha somasy 57,8 mln teńgege satyp alý júrgizgen.

Esil aýdanynda turǵyn úı-kommýnaldyq sharýashylyq bólimi satyp alynatyn taýardyń markasyn kórsete otyryp, 113,8 mln teńgege kómir satyp almaq bolǵan.

Qazirgi ýaqytta qadaǵalaý organynyń aralasýynan keıin bul memlekettik satyp alýlar joıyldy, kináli laýazymdy tulǵalardy zań boıynsha jaýapkershilikke tartý sharalary júrgizilip jatyr.

Jalpy jyl basynan beri prokýrorlar bul salada 20 memlekettik satyp alýdy joıyp, nátıjesinde 7,1 mlrd teńge bıýdjet qarajatynyń negizsiz jumsalýyna jol bermedi.

Zań buzýshylyqtar boıynsha 29 laýazymdy tulǵa ártúrli jaýapkershilikke tartyldy, onyń ishinde jeteýi memlekettik qyzmettiń bedelin túsirgeni úshin, olardyń 4-i jumystan bosatyldy jáne 3-i tolyq qyzmettik sáıkessizdigi týraly eskertildi.

Buǵan deıin SQO-da bıyl dári-dármek satyp alýǵa 9,3 mlrd teńge jumsalatynyn aıtqan edik.