SQO koronavırýs boıynsha «jasyl» aımaqqa endi
PETROPAVL. QazAqparat – Soltústik Qazaqstan oblysy koronavırýs boıynsha «jasyl» aımaqqa enip, jańa jaǵdaılar tirkelmegendikten 5 eldimekennen karantın alyndy, dep habarlaıdy QazAqparat tilshisi.
SQO Sanıtarııalyq-epıdemıologııalyq baqylaý departamenti bastyǵynyń orynbasary Tatıana Gorlovanyń qatysýymen búgin óńirdegi epıdemıologııalyq jaǵdaı boıynsha brıfıng ótti.
T.Gorlovanyń aıtýynsha, sońǵy táýlikte SQO-da aýrýdyń 35 jaǵdaıy tirkelgen. Sonyń 18-i Petropavl qalasynda, 3-ýi Mamlıýt aýdanynda, Qyzyljar men Ýálıhanov aýdandarynda - 6 jáne Ǵ.Músirepov, M.Jumabaev aýdandarynda 1 jaǵdaıdan anyqtaldy. Jalpy aýyrǵandar sany 4841-ge jetken.
«Onyń 30-ynda PTR-test epıdemıologııalyq kórsetkishke oraı alynsa, shekaradan ótken eki adamnan jáne epıdemıologııalyq baqylaý aıasynda taǵy úsh adamnan anyqtaldy. Áli de eń úlken úles – 46% 50 jastan asqandarǵa tıesili», - deıdi Tatıana Gorlova.
Qazir SQO-da 8 aýdannyń 11 eldimekeni karantınge jabyq. Jaǵdaıdyń jaqsarýyna baılanysty buryn jabylǵan 5 aýyldan – Aqjar aýdanyndaǵy Kazanskoe, Lenıngradskoe eldimekenderinen, Taıynsha aýdanyndaǵy Kırov pen Chermoshnıankadan jáne Shalaqyn aýdanyndaǵy Povozochnoedan karantın alyndy.
«SQO búginnen bastap koronavırýs boıynsha «jasyl» aımaqqa endi. Biraq, buǵan qýanýǵa áli erte. Jaǵdaı kúnde ózgerýde. Erteń-aq kórsetkish artýy múmkin. Sol sebepti karantın talaptaryn saqtaýymyz qajet», - deıdi sanıtarııalyq dáriger.
Karantın talaptarynyń saqtalýyn óńirde monıtorıngtik toptar qadaǵalaýǵa alǵan. Osy aralyqqa deıin 1261 ákimshilik hattama toltyrylǵan. Onyń 1158-i qoǵamdyq oryndarda maska taqpaǵan jeke tulǵalarǵa qatysty. Jalpy salynǵan aıyppuldyń mólsheri – 71 mln teńgeden asady. Búginde departamentte tártip saqshylarynan túsken 400-ge jýyq is qaralyp jatyr.
