SQO kópbeıindi aýrýhana qurylysy qashan aıaqtalady – mınıstr jaýaby

PETROPAVL. KAZINFORM – Soltústik Qazaqstan oblysyndaǵy «saqaldy» qurylys – kópbeıindi aýrýhana ǵımaraty 1,5 jyl ishinde paıdalanýǵa berilmek. QR Densaýlyq saqtaý mınıstri Aqmaral Álnazarova óńirge sapar barysynda osy salada atqarylyp jatqan jumystardyń birqataryna toqtaldy.

2019 jyly qurylysy bastalyp, sodan beri bitpeı jatqan oblystyq kópbeıindi aýrýhana ǵımaratyn túrik ınvestorlary Petropavlda turǵyzyp jatyr. Kezinde jarnamasy jer jarǵan bolashaq emdeý mekemesi joba boıynsha joǵary tehnologııalyq qondyrǵylarmen jabdyqtalady. ıAǵnı óńir turǵyndary eshqaıda barmaı-aq sapaly medıtsınalyq kómek almaq.

Jańa aýrýhananyń qashan qoldanysqa engiziletini kóptiń kókeıinde júrgen suraq. Óńirge kelgen Densaýlyq saqtaý mınıstri qurylys alańynda bolyp, ınvestorlarmen kezdesti. 

«Oblystyq kópbeıindi aýrýhana 480 orynǵa arnalǵan. Merdigerlermen kezdestik, qurylystyń qarqyndy júrýin men de óz tarapymnan suradym, sebebi 250 adamdaı ǵana búginde jumys atqaryp jatyr. Jyldyń aıaǵyna deıin monolıttiń qurylysy aıaqtalady. Kelesi jyldyń sońy nemese 2026 jyldyń basynda qurylys tolyq bitpek. Eskere keter jaıt, bul jeke ınvestıtsııaǵa salynyp jatyr, sol sebepti, bekitilgen eshqandaı is-shara jospary nemese kelisimsharttar joq. Densaýlyq saqtaý mınıstrligi naýqastardyń legin uıymdastyryp berýge daıyn. Búgingi kúni qurylysty tezdetip aıaqtaý jáne jergilikti atqarýshy organnyń balansyna berý máselesi qarastyrylyp jatyr», - dedi Aqmaral Álnazarova. 

Jalpy, Prezıdent bastamasymen «Aýyldyq densaýlyq saqtaýdy jańǵyrtý» ulttyq jobasy aıasynda elimizde 565 medıtsınalyq nysan salynyp, iske qosylýy tıis bolsa, sonyń 38-i SQO-ǵa tıesili. Onyń barlyǵynda qurylys kestege saı júrip jatyr. 

«Beskól aýylyndaǵy Qyzyljar aýdandyq emhanasynda boldym. Qazir bul aýdanda 48 myńnan astam adam turyp jatyr. Halyqtyń ósýine, ári ǵımarattyń eskirýine baılanysty jańa emhananyń qajettiligi týyndap otyr. Búgingi kúni ákimdik óz tarapynan tıisti qujattardy daıyndap jatyr. Biz óz tarapymyzdan bul máseleniń sheshilýine at salysamyz», - dedi Densaýlyq saqtaý mınıstri. 

Buǵan deıin Qazaqstanda dári-dármek óndirisi 20% óskenin jazǵan edik.