SQO kolledjderinde qandaı mamandyqtar memlekettik tapsyrys negizinde daıarlanady
PETROPAVL. KAZINFORM — Soltústik Qazaqstan oblysynda kolledjderge arnalǵan memlekettik bilim berý tapsyrysy óńir ekonomıkasy men eńbek naryǵynyń naqty qajettilikterine sáıkes qalyptastyryldy.
Máselen, bıyl eń kóp oryn qyzmet kórsetý salasyna bólingen. Bilim ordalary osy baǵytta 450 stýdentti qabyldaıdy. Budan bólek bilim berý men bıznes jáne quqyq baǵyttarynyń árqaısysyna 400 orynnan qarastyrylǵan. Aýyl sharýashylyǵyna — 400, qurylysqa — 350, aqparattyq tehnologııalarǵa — 300, metall óńdeýge — 300 oryn bólindi.
Sonymen qatar kólik, energetıka, eńbekti qorǵaý, jeńil ónerkásip, óner jáne medıtsına salalary boıynsha da mamandar daıarlanbaq.
SQO bilim basqarmasynyń málimetinshe, qazirgi ýaqytta kolledjderge túsý úshin 3 600 ótinish qabyldandy.
Jańa oqý jylynda oblysta tehnıkalyq jáne kásiptik bilim beretin 23 kolledj jumys isteıdi. Onda 11 myńnan astam stýdent bilim almaq. Al birinshi kýrsqa 3 725 stýdent qabyldaý josparlanǵan.
— Kolledj stýdentterin bolashaq mamandyǵyna erte beıimdeý maqsatynda praktıkalyq oqytýǵa basymdyq berilip otyr. Qazir 21 kolledjde 23 mamandyq boıynsha 620 kásiporynmen birlesip dýaldy oqytý júıesi engizilgen. Bul júıe stýdentterge oqý barysynda alǵan teorııalyq bilimin tikeleı óndiriste tájirıbeden ótkizýge múmkindik beredi.
Jospar boıynsha dýaldy oqytýmen 2,5 myńnan astam stýdent qamtylady. Bul memlekettik bilim berý tapsyrysynyń shamamen — 28%, — deıdi SQO bilim basqarmasynyń basshysy Aınagúl Suraǵanova.
Kásibı daǵdylarmen qatar jastardyń kásipkerlik qabiletin damytý maqsatynda 5 kolledjdiń bazasynda shaǵyn kásiporyndar jumys isteıdi. Olar halyqqa túrli qyzmet kórsetip, jumys tájirıbesin jınaqtaýǵa múmkindik beredi.
Osyǵan deıin elimizde sý salasyna maman daıarlaıtyn oqý oryndarynyń sany 1,5 ese óskenin jazǵan edik.
