SQO kólderindegi qyzylqurt zańsyz shekara asyrylyp jatyr
PETROPAVL. QazAqparat - Soltústik Qazaqstan oblysynyń ákimi Qumar Aqsaqalov aımaqtaǵy kólderde kezdesetin qyzylqurt jándigin (Artemııa salına) aýlaýdy óndiristik kólemde uıymdastyrýdy usyndy, dep habarlaıdy «QazAqparat» HAA tilshisi.
«Mol paıda ákeletin bıznes bolǵan soń, qyzyl qurttyń zańsyz aýlanyp jatqanyn jıi estip júrmin. Altaı aımaǵynda bul óndiristik jolǵa qoıylǵan. Olar Qytaıǵa jiberiletin qurttan 35 mlrd teńgege deıin paıda tabady», - dedi Qumar Aqsaqalov.
Atalmysh qurt Soltústik Qazaqstan oblysynyń 17 kólinde kezdesedi.
Óńirdegi Tabıǵı resýrstar jáne tabıǵatty paıdalanýdy retteý basqarmasynyń basshysy Qabıden Sádýaqasovtyń aıtýynsha, ájeptáýir qundy turatyn jándik Qytaıǵa jóneltiledi, Qazaqstanda oǵan suranys joq.
Al oblystaǵy memlekettik kirister departamentiniń basshysy Danııar Janalınov, qyzyl qurtty zańsyz aýlaý faktileriniń jıilep ketkenin, ony aldymen Pavlodar oblysyna jetkizip, odan ary Qytaı asyryp jatqanyn aıtty.
Qazirdiń ózinde qurt aýlaýmen aınalysqandardyń ústinen birneshe qylmystyq is qozǵalǵan. QazAqparat qarasha aıynda Ýálıhan ózeninde iri kontrabandanyń joly kesilgeni týraly jazǵan da bolatyn.
«Syrtqa zańsyz shyǵarylyp jatyr, salyq tólemeıdi, Kóldiń ıeleri nege áli kúnge deıin jumys istep tur. Olar kóldi jalǵa alǵan eken, nege sol mańdy kúzetý is-sharalaryn júrgizip, oǵan qarjylaryn quımaıdy. Tabıǵat baılyǵy halyq ıgiligine jumsalyp jatqan joq», - dedi SQO ákimi
Eske sala keteıik, Artemııa salına tuzdy kólderdi mekendeıdi. Ony kosmetıkalyq zattarǵa arnalǵan belsendi bıologııalyq qospalarǵa arnalǵan shıkizat retinde paıdalanady.
