SQO kóktemgi egiske 68,2 myń tonna arzandatylǵan dızel otynyn alady
PETROPAVL. QazAqparat – Soltústik Qazaqstan oblysy kóktemgi egis naýqanyn 5 maýsymǵa deıin aıaqtamaq. Tuqym, tehnıka, dızel otyny jetkilikti, dep habarlaıdy QazAqparat tilshisi.
SQO aýyl sharýashylyǵy jáne jer qatynastary basqarmasynyń málimetinshe, sharýashylyqtar qajetti tuqymmen tolyq qamtamasyz etildi.
Jalpy kólemi 479 myń tonna, onyń ishinde dándi jáne burshaq daqyldary 387 myń tonnany, maıly daqyldar 29 myń tonnany, jem-shóp 1400 tonnany, kartop 61 myń tonnany quraıdy. Barlyq tuqym sapaly.
«Bizdiń oblys úshin kóktemgi egis jumystaryn júrgizýge Pavlodar jáne Atyraý munaı-hımııa zaýyttarynan 68,2 myń tonna arzandatylǵan dızel otyny jetkiziledi. Naýryz-sáýir aılarynda arnaıy kestege sáıkes 37 myń tonna dızel otyny alyndy, olar boıynsha sharýashylyqtarmen sharttar jasaldy. Mamyr aıynda 30,9 myń tonna dızel otyny jetkiziledi dep josparlanǵan. Naýryz-mamyr aılarynda agroqurylymdar úshin dızel otynynyń sońǵy baǵasy 1 lıtr úshin 172 teńgeni quraıdy», - deıdi SQO aýyl sharýashylyǵy jáne jer qatynastary basqarmasynyń bas mamany Narǵyz Aqjigitova.
Mamannyń aıtýynsha, mıneraldyq tyńaıtqyshtardy jetkizýshilerden satyp alýǵa jalpy kólemi 148 myń tonnanyń sharty jasaldy. Búgingi kúni zaýyttar men jetkizýshilerdiń derekteri boıynsha, 135 myń tonnanyń aqshasy tólendi jáne 93 myń tonna tıelip, jóneltildi.
Óńirde egis alqaptary mıneraldy tyńaıtqyshtarmen baıytylyp jatyr.
Búgingi kúni topyraqqa 752 myń ga alańǵa 55 myń tonna mıneraldy tyńaıtqysh engizildi.
Eske sala ketsek, buǵan deıin SQO-da kóktemgi egistiń bastalǵanyn aıtqan edik. Bıyl óńirde qaraqumyq alqaby 2,4 ese ulǵaıdy.
