SQO Qyzyljar aýdanynda tasqynda zaqymdanǵan 320 úı apatty dep tanyldy
PETROPAVL. KAZINFORM – Soltústik Qazaqstan oblysy Qyzyljar aýdanyndaǵy Bolshaıa Malyshka eldi mekenind kóktemgi tasqyn kezinde 321 úı sý astynda qaldy. Onyń 66-sy apatty dep tanylǵan.
«AMANAT» partııasy SQO fılıaly baspasóz qyzmetiniń málimetinshe, QR Parlamenti Májilisiniń depýtattary Erkebulan Mámbetov pen Dmıtrıı Koloda Bolshaıa Malyshka eldi mekeninde bolyp, turǵyndardyń saýalyna jaýap berdi. Úıleri apatty dep tanylǵandardyń bir bóligine baspana aýdannan alynsa, endi birine oblys ortalyǵynda salynyp jatqan úılerdiń kilti tabys etilmek. Pavel Vojjovtyń úıi de tasqyn kezinde zaqymdandy. Aıtýynsha, sý bir aıǵa jýyq ýaqyt turǵan. Qazir baspanasy jóndelip jatyr.
«Meniń úıimdi qalpyna keltirýge 5 mln 700 myń teńge bólindi. Onyń jartysy materıalǵa jumsalsa, qalǵany baspanany jóndep jatqan jumysshylarǵa tólenedi. Shilde aıynyń sońynda jumys aıaqtalady. Jalpy ótemaqynyń mólsheri kóńilimnen shyqty», - deıdi Pavel Vojjov.
Alaıda sarapshy-baǵalaýshynyń qorytyndysymen kelispegender de bar. Májilismenderge osy problema boıynsha halyq kóp saýal joldaıdy eken. Sondaı-aq, sý tasqynynan zardap shekkender smetalyq qujatty qaıta qaraý, turǵyn úıge menshik quqyǵyn rastaıtyn qujattardyń bolmaýy sııaqty máselelerdi sheshýge kómektesýdi suraıdy.
«Oblysta tasqynnan zardap shekkenderdiń 90 paıyzy Petropavl qalasy men Qyzyljar aýdanynyń turǵyndary. Sý tasqyny kezinde biz ótemaqyny óteý erejelerine tereń úńildik. Ol jerde ótemaqy tek turǵylyqty jeri boıynsha tirkelgenderge ǵana tólenedi dep jazyldy. Biz buny durys emes dep sanap, óz atymnan depýtattyq saýal joldadym. Qazir bul tarmaq alynyp jatyr», - deıdi Májilis depýtaty Dmıtrıı Koloda.
Bolshaıa Malyshka eldi mekeninde 900 adam turady. Qazirgi ýaqytta aýylda jańa feldsherlik-akýsherlik pýnkt salynyp jatyr. Qyzyljar aýdany ákimi baspasóz qyzmetiniń málimetinshe, Qyzyljar aýdanynda sý tasqynynda barlyǵy 1546 úıge zaqym keldi. Qazirgi ýaqytta onyń 320-sy apatty dep tanylǵan.
Buǵan deıin Petropavldaǵy «Qarasaı» stadıonynda jóndeýdiń ekinshi kezeńi bastalǵanyn jazǵan edik.
