SQO Qyzyljar aýdanynda qaldyqtar polıgony jabylyp, jaqyn mańdaǵy ormandar qoqysqa toldy
PETROPAVL. KAZINFORM — Soltústik Qazaqstan oblysy Qyzyljar aýdany Báıterek aýyly mańyndaǵy ruqsatsyz jumys istegen qoqys polıgony jabylǵanymen, ornyna jańasy ashylǵan joq.
Qyzyljar aýdandyq ákimdigi qatty turmystyq qaldyqtar polıgonyna Trýdovaıa Nıva jáne Chapaevo eldi mekeni mańynan jer ýchaskesin bólgen.
Aýyl turǵyndarynyń aıtýynsha, 6 ga jer berildi. Biraq bul ýchaske men eldi mekenderdi 1 km ǵana bólip jatyr. Sol sebepti olar bul jerde polıgonnyń ashylýyna qarsy.
Sol sebepti Trýdovaıa Nıva jáne Chapaevo eldi mekenderiniń turǵyndary SQO boıynsha ekologııa departamentine shaǵym túsirdi.
— Aýyldyqtar eldi mekenderdiń janyna turmystyq qoqysty ruqsatsyz tastap jatqanyn aıtty. Osy shaǵym negizinde departament Qyzyljar aýdany Beskól aýyldyq okrýg ákimdigi apparatyna jospardan tys tekseris júrgizdi. Tekseris nátıjesinde derek rastaldy. Ákimdik jer ýchaskesin turmystyq qatty qaldyqtardy tastaýǵa bólgenimen, onyń qorshaǵan ortaǵa áserin taldap, baǵalamaǵan. Ruqsat berilgen qujattary joq.
Tekserý qorytyndysy boıynsha Beskól aýyldyq okrýg ákimdigi apparatyna bul ýchaskeni turmystyq qatty qaldyqtardan bosatý jóninde nusqama berildi. Al zańsyzdyqqa jol bergeni úshin laýazymdyq tulǵa — Beskól aýyldyq okrýginiń ákimine ákimshilik quqyq buzý jóninde hattama toltyryldy, — dedi SQO boıynsha ekologııa departamentiniń bas mamany Igor Gah.
Qazirgi ýaqytta Beskól aýyldyq okrýgi ákimdiginiń apparaty bul jer ýchaskesin qoqystardan tazartý jumysyn júrgizip jatyr.
SQO-daǵy Báıterek jáne Beskól turǵyndarynyń mazasyn qashyrǵan qoqys polıgony jabylǵanyna bir jarym aıdan asqanymen, onyń ornyna jańasy áli ashylǵan joq.
Aýyl ákimi Gúlsim Kárimova turǵyndarǵa qoqysty shamamen 30-40 shaqyrym jerdegi Shahovskoe aýylynyń mańyndaǵy qatty turmystyq qaldyqtar polıgonyna aparyp tógýge keńes berdi. Alaıda, ol jaqqa aparyp tógip jatqandar búginde neken-saıaq. Qazir eldi mekender janyndaǵy ormandar qoqysqa tola bastaǵan.
Buǵan deıin SQO-daǵy Voloshınka eldi mekeni eki aıǵa jýyq aýyzsýsyz otyrǵanyn jazǵan edik.