SQO Qazaqstandaǵy agroınvestıtsııanyń 25% qamtamasyz etti
NUR-SULTAN. QazAqparat – SQO-da aýyl sharýashylyǵy ónimderin qaıta óńdeýge basymdyq beriledi.
Bul týraly Soltústik Qazaqstan oblysynyń ákimi Qumar Aqsaqalov aıtyp berdi, dep habarlaıdy QazAqparat tilshisi.
«Aýyl sharýashylyǵy – bizdiń aımaq úshin negizgi sala. Byltyr osy alańda aýyl sharýashylyǵyn ártaraptandyrý baǵytyn tańdaý týraly aıttym. Ol óziniń jemisin berýde. Aýyl sharýashylyǵy óniminiń kólemi – 700 mlrd teńgege jetti. Bul 2019 jyldyń kórsetkishinen 89 mıllıard teńgege asyp tústi», - dedi óńir ákimi Ortalyq kommýnıkatsııalar qyzmetinde ótken brıfıngte.
Jyl sońyna deıin 115 mıllıard teńge ınvestıtsııa tartylady. Osylaısha, aımaq eldegi agroınvestıtsııanyń 25% qamtamasyz etedi.
«Qurǵaqshylyqqa qaramastan, biz dástúr boıynsha el astyǵynyń tórtten birin jáne maıly daqyldardyń úshten birin jınadyq. Bul – barlyq agrotehnıkalyq sharalardy oryndaýdyń nátıjesi. Óńir dıqandary respýblıkada tehnıkany jańartý jáne mıneraldy tyńaıtqyshtardy engizý boıynsha kósh basynda tur.
Biz ósirilgen ónimdi meılinshe qaıta óńdeýimiz kerek. Ózderińiz biletindeı, astyq óńdeý boıynsha segiz jyldyq úzilisten keıin «Bıopereıshn» JShS iri jobasy qalpyna keltirildi. Jaqynda zaýytty jańǵyrtýdyń úshinshi kezeńi aıaqtalady, oǵan ınvestor 12 mlrd teńge saldy. Endi kásiporyn krahmal, glıýten, jelimtekpen birge bıoetanol óndiredi. Bıoetanol, eń aldymen, otyndaǵy oktandy kóbeıtedi. Ónimge suranys joǵary. Qazir Pavlodar munaı óńdeý zaýytyna bıoetanol jetkizýge shart jasastyq. Bastapqy kezeńde jylyna 20 myń tonna bıoetanol óndirý josparlanýda, onyń kólemi birtindep 36 myń tonnaǵa deıin ulǵaıady. Osylaısha, biz eldiń osy ónimge degen qajettiligin tolyǵymen jabamyz», - dedi Q. Aqsaqalov.
