SQO kásipkerlerine 4 trln teńgege jýyq shyǵyndy jabý mindetteldi
PAVLODAR. KAZINFORM — Búgin Pavlodarda «Obýhovskıı KBK» JShS jáne «Tıolaın» JShS basshylaryna, sondaı-aq taǵy eki sottalýshyǵa úkim shyǵaryldy.
Tergeý málimetteri boıynsha, Obýhovskıı ken baıytý kombınatynda (KBK) tıtan-tsırkonıı kenin óndirýmen jáne óńdeýmen aınalysqan ákeli-balaly Dolgaloevtar qoınaýynan 917 myń tonnadan astam paıdaly qazbalardy zańsyz óndirgen.
2021 jyly Indýstrııa jáne ınfraqurylymdyq damý mınıstrligi «Tıolaın» JShS-men jer qoınaýyn paıdalanýǵa ýaǵdalastyqtardy toqtatý týraly sheshim qabyldaǵan. Onyń izin ala sot protsesteri bastalǵan. Alaıda sot isi júrip jatqan kezeńderde KBK-da ken óndirý toqtatylmaǵan. Nátıjesinde 2021-2024 jyldar aralyǵynda qazyp alynǵan paıdaly qazbalar qylmystyq istiń mánine aınalǵan. Aıyptaý aktisinde «Obýhovskoe» ken ornynyń jer qoınaýyn zańsyz paıdalaný saldarynan 10.04.2021 jyldan 15.04.2024 jylǵa deıingi kezeńde ekonomıkalyq zalal 3 988 514 249 738, 12 teńge bolǵany kórsetilgen.
Qylmystyq is alǵash ret Soltústik Qazaqstan oblysynda alqabılerdiń qatysýymen qaralyp, 2024 jyldyń jeltoqsanynda aqtaý úkimi shyǵarylǵan. Keıin apellıatsııalyq alqa álgi úkimniń kúshin joıyp, qaıta qaraýǵa jiberedi. Biraq qylmystyq is bul joly Pavlodarǵa jóneltiledi.
Pavlodar oblysynyń qylmystyq ister jónindegi mamandandyrylǵan aýdanaralyq sotynda alqabılerdiń qatysýymen sot talqylaýy 8 aıǵa sozylyp, úkim tek búgin shyǵaryldy. Sotta barlyq aıyptalýshy kináli dep tanyldy. Vıktor Dolgalevke 11 jyl bas bostandyǵynan aıyrý jazasy taǵaıyndaldy. Al onyń uly Danıl Dolgalev raqymshylyqty eskere otyryp, 4 jyl 9 aı bas bostandyǵynan aıryldy.
Buǵan qosa, atalǵan qylmystyq is boıynsha jábirlenýshi dep tanylǵan SQO Taıynsha aýdanynyń ákimdigi men Ónerkásip jáne qurylys mınıstrliginiń 4 trıllıon teńgege jýyq talap aryzy tolyq kólemde qanaǵattandyryldy.
Sotta taǵy ekeýi sottalýshy — advokat jáne deldaldyń isi de qaraýsyz qalǵan joq. Olar para berdi jáne alaıaqtyq jasady dep aıyptaldy. Sot olardyń árqaısysyna 10 jylǵa bas bostandyǵynan aıyrý jazasyn taǵaıyndady.
Eske sala keteıik, buǵan deıin Pavlodar oblysynda 291 mln teńgeni qoldy qylǵan sheneýnik pen kásipker 7 jylǵa sottaldy.