SQO kásipkerleri óndiristi damytýǵa kedergi bolyp turǵan máselelerdi atady
PETROPAVL. KAZINFORM – «Atameken» Ulttyq kásipkerler palatasy maýsym aıynan bastap otandyq ınvestorlar men óndirisin keńeıtip jatqan kásiporyndardy súıemeldeý boıynsha jańartylǵan «bir tereze» tetigimen jumys isteı bastady.
Bul týraly Soltústik Qazaqstan oblysyna kelgen Palatanyń Investıtsııalar departamenti dırektorynyń orynbasary Nazgúl Ýzalına aıtty.
- Biz jobalardy jergilikti deńgeıde de, ortalyq deńgeıde de súıemeldeımiz. Óńirlik palatalarǵa ınvestıtsııalyq shtabtarda daýys berý quqyǵy berildi. Bul ózgerister Kásipkerlik kodeks pen Ulttyq kásipkerler palatasy týraly zańǵa engizildi, - dedi Nazgúl Ýzalına.
Onyń aıtýynsha, ortalyq deńgeıde sheshýdi qajet etetin máseleler Úkimettiń Jobalyq keńsesine shyǵarylady. Keıbir problemalar Bas prokýratýramen birlesip sheshiledi.
- Kelesi qadam - barlyq ınvestıtsııalyq jobalardy ıdeıa kezeńinen bastap jańartylǵan Ulttyq tsıfrlyq platforma arqyly júrgizý. Bul jobalardyń jergilikti deńgeıde negizsiz alynyp tastaýyna jol bermeıdi, - dedi Nazgúl Ýzalına.
Osy maqsatta «Atameken» UKP ókili SQO-da kásipkerlermen kezdesip jatyr. Kásiporyndardyń óndiristik jobalaryn iske asyrýǵa kedergi keltirip otyrǵan máseleler men aıtylǵan usynystar keıin Úkimet pen tıisti mınıstrlikter deńgeıinde qaralmaq.
Petropavldaǵy «Qyzyljar» arnaıy ekonomıkalyq aımaǵynyń rezıdentteri óndiris oryndaryn damytýǵa kedergi keltirip otyrǵan birqatar máselege nazar aýdardy. Kásipkerler qarjylandyrý, logıstıka, elektr qýaty, sondaı-aq memlekettik qoldaý sharalaryna qol jetkizý máselelerin kóterdi.
Kásipkerlerdiń aıtýynsha, óndiristi jolǵa qoıý kezinde qarjylyq jáne kólik máselelerimen qatar, QR Ónerkásip jáne qurylys mınıstrligimen ózara is-qımyl barysynda da birqatar qıyndyq týyndaǵan.
Atap aıtqanda, ınvestorlar kólik quraldaryn ónerkásiptik qurastyrý týraly kelisimge otyrý jáne otandyq taýar óndirýshiler tizilimine engizilý kezinde kedergilerge tap bolyp otyrǵanyn aıtty.
Ónerkásiptik qurastyrý týraly kelisim aıasynda kásiporyndarǵa óndiristi jergiliktendirý jáne ishki naryqty otandyq ónimmen qamtamasyz etý boıynsha mindettemeler júkteledi. Onyń ornyna memleket kompanııalarǵa birqatar, sonyń ishinde salyqtyq jeńildik beredi. Kásipkerlerdiń pikirinshe, mundaı qoldaý bolmasa, Qazaqstandaǵy óndiristiń básekege qabilettiligin saqtaý qıyn.
Máselen, «QILU Agro» JShS óńirde traktor óndirisin damytyp jatyr.
- 2023 jyly tirkelip, 2 myń sharshy metr aýmaqta alǵashqy kezeńdi aıaqtadyq. Jabdyqtardy ákelip, óndiristi jergiliktendirýdi bastadyq jáne traktorlardyń alty modelin sertıfıkattadyq. Qazir aýmaǵy 5200 sharshy metr bolatyn ekinshi tsehtyń qurylysyn júrgizip jatyrmyz. Ol jerde aspaly jabdyqtar shyǵarýdy josparladyq, - deıdi kásiporyn ókili Jaslan Chılý.
Alaıda kásiporyn ázirge otandyq taýar óndirýshiler tizilimine ene almaı, sýbsıdııalardy paıdalana almaı otyr. Saldarynan fermerlerden de 15-20% jeńildikti alyp tastaǵan.
- Mınıstrlikte eger Qazaqstanda osyndaı komponentterdi shyǵaratyn basqa kásiporyn bolsa, ótinishke qol qoıylmaıtynyn aıtty. Sondaı-aq ótinim bergen kezde kabınalar óndiretin daıyn jeliniń birden bolýy talap etiledi. ıAǵnı kelisý kezeńiniń ózinde qoldaýdy kórip turǵan joqpyz, - deıdi Jaslan Chılý.
Buǵan deıin SQO-da kásipkerler logıstıka shyǵynynyń kóbeıgenine shaǵymdanǵanyn jazǵan edik.
