SQO kásipkerleri mektep ashanasyna arnalǵan jańa standarttyń kemshilikterin atady
PETROPAVL. KAZINFORM – Soltústik Qazaqstan oblysynda mekteptegi tamaqtanýǵa qatysty jańa standarttardy engizý máseleleri qyzý talqyǵa tústi.
Óńir kásipkerleri jańa talappen kelispeıdi. Bul týraly SQO kásipkerler palatasy uıymdastyrǵan jıynda aıtyldy. Qatysýshylardyń pikirinshe, jańa mázirde óńir erekshelikteri eskerilmegen, bul taǵamnyń sapasy men qaýipsizdigine áser etýi múmkin.
«Botaqan» QB tóraǵasy Olga Ýsoltsevanyń aıtýynsha, kóptegen ónim, mysaly, kúrketaýyq eti, sýdak balyǵy, qytaı qyryqqabaty, keıbir jemister jergilikti naryqta joq nemese óte qymbat. Jańa mázirmen ázirleý úshin jańa qondyrǵylar alý qajet, al mektepterdiń elektr qýaty jetkiliksiz. Ári bıýdjet shekteýli – 1 balaǵa tamaqtanýǵa bólinetin soma: bastaýyshqa – 637 teńge, orta býynǵa – 745 teńge, al joǵary synypqa 794 teńge. Al jańa mázirge saı eń tómengi shyǵyn 688 teńgeden bastalady.
SQO Kásipkerler palatasy dırektorynyń orynbasary Jeńis Qazıev jańa mázirdi 1 qyrkúıekten bastap engizý – zańsyz, kelisimsharttar 2025 jyldyń sońyna deıin jaramdy, sondyqtan jyl sońyna deıin eski mázirmen jumys jalǵasady.
Jıynǵa Bólshek saýda jáne qoǵamdyq tamaqtandyrý qaýymdastyǵynyń vıtse-prezıdenti Marına Lapteva qatysty. Onyń aıtýynsha, qaýymdastyq mekteptegi tamaqtaný júıesin reformalaýdy qoldaıdy, alaıda onyń óńirlerde júzege asyrylýynda aıtarlyqtaı qıyndyqtar bar.
– Siz durys aıttyńyz, bıyl 1 qyrkúıekten bastap jańa tamaqtaný standarty kúshine endi. Bul standart birizdendirilgen talaptardy kózdeıdi. Buryn ár óńir óz qalaýy boıynsha ǵana etti mázirge qosatyn. Al endi, qandaı ónimder qansha ret berilýi kerektigi jáne eń bastysy – taǵamnyń kalorııalyǵy men qorektik quramy naqty rettelgen. Barlyq óńirlik mázirler endi birtutas bolýy tıis. Bul árıne, durys. Mektep mázirine qatysty reformany biz, qaýymdastyq retinde, qoldaımyz. Biraq óńirlerde birqatar másele bar, - dedi Marına Lapteva.
Onyń aıtýynsha, SQO-ǵa arnalǵan mázir mektep dırektorlaryna jáne kásipkerlerge 30 tamyzda jiberilgen, eshqandaı óńirlik beıimdeýsiz bekitilgen.
– Nelikten bul mázir sizdiń óńirge sáıkes kelmeıdi? Birinshiden, mázirde pisirme-zapekanka kóp. Olardy daıyndaý úshin qosymsha pesh qajet, al onyń qýaty – 14,8 kVt. Qosymsha jabdyq qoıǵanda, elektr jelisi shamadan tys júktelip, búkil mektepte jaryq óshedi. Sondaı-aq pisirmege burshaq, noqat pen jasymyq birge qosylǵan. Bul – dám jaǵynan da, sińimdilik turǵysynan da durys emes. Bul quram gaz túzilýin kúsheıtedi. Sondyqtan balaǵa mundaı taǵamdardy berýge bolmaıdy. Bul máseleni tıisti mınıstrlikterge jetkizdik. 29 tamyzda ótken birlesken kezdesýde mınıstrlik ókili mázirdi ár óńirge beıimdeý qajettigimen kelisti, - dedi Marına Lapteva.
SQO Densaýlyq saqtaý basqarmasy basshysynyń orynbasary Nursultan Sarjanov 2 qyrkúıekte shyqqan jańa buıryq óńirlik mázir jasaýǵa múmkindik beretinin aıtty.
– Buıryq aıasynda eki nusqadaǵy mázir usynyldy. Ónimderdi tek arnaıy qosymshada kórsetilgen tizim boıynsha ǵana almastyrýǵa bolady. ıAǵnı ádistemelik usynymdar engizilgennen keıin, bizde óńirlik mázir qurastyrý quqyǵy paıda boldy, - deıdi Nursultan Sarjanov.
Nátıjesinde SQO-da jańa mázir 2026 jyldyń basyna deıin engizilmeıtin boldy. Mektepter burynǵy mázirmen jumysyn jalǵastyrady. Al mázirdi óńirge beıimdeý úshin arnaıy aralas vedomstvolyq jumys toby qurylady, onyń quramynda: SES, bilim, densaýlyq saqtaý basqarmalary ókilderi, kásipkerler palatasy, tehnologtar men dıetologtar bolady.
Mamandar mázirdiń ózgerýine baılanysty ata-analarmen túsindirý jumystaryn júrgizýdi usyndy. Óıtkeni SQO boıynsha artyq salmaqpen aýyratyn balalardyń úlesi respýblıka boıynsha joǵary.
Buǵan deıin 2025 jyldyń 1 qyrkúıeginen mektepterde jańa Tamaqtaný standarty engiziletinin jazdyq.
Sondaı-aq Májilis depýtaty Ashat Aımaǵambetov mektep ashanasyndaǵy qaýipsizdikti qamtamasyz etýdiń jańa formatyn usyndy.