SQO kásipkerleri kóbine qandaı máselemen kómek surap júginedi
PETROPAVL. KAZINFORM — Soltústik Qazaqstan oblysynda kásipkerlerdiń quqyqtaryn qorǵaýǵa qatysty 9 aıda 83 ótinish qaralyp, onyń 41-i oń sheshimin tapty.
Nátıjesinde bıznes ókilderiniń 180 mln teńgeden astam múliktik quqyǵy qorǵaldy. Kásipkerler eń kóp memlekettik satyp alý, salyq jáne býhgalterlik esep, sondaı-aq sýbsıdııa máseleleri boıynsha kómek suraǵan. Bul týraly Kásipkerler palatasynyń ókilderi Kásipkerlerdiń quqyqtary men zańdy múddelerin qorǵaý boıynsha 9 aıdaǵy jumys qorytyndysyn jarııalaǵan jıynda málimdedi.
Kásipkerler palatasyna kóbine dıqandar máselelerimen júgingen. Bul barlyq ótinishtiń — 33%. Odan keıin jumys jáne qyzmet kórsetý salasy — 22%, saýda jáne syrtqy ekonomıkalyq qyzmet — 15%. Qalǵan 30% basqa baǵyttarǵa tıesili.
Kásipkerler eń kóp memlekettik satyp alý, salyq jáne býhgalterlik esep, sondaı-aq sýbsıdııa máseleleri boıynsha kómek suraǵan.
Kásipkerlerdiń quqyqtaryn qorǵaýda prokýratýra men Ekonomıkalyq tergeý departamentiniń kómegi kóp. Osyndaı birlesken qabyldaýlar men túsindirý kezdesýleriniń nátıjesinde kásipkerlerdiń 7 máselesi oń sheshimin tapqan.
Kásipkerler men Palata ókilderi óńirdegi 48 konsýltatıvtik-keńesshi organnyń jumysyna qatysady. Jyl basynan beri olardyń 179 otyrysynda kásipkerlikke qatysty 292 másele qaralǵan.
Qazirgi tańda jergilikti kásipkerler kótergen 73 másele respýblıkalyq deńgeıdegi problemalar tizilimine engizilgen. Onyń 14-i bıyl usynylǵan. Bul máselelerdi sheshý úshin jalpyulttyq zańnama men zańǵa táýeldi aktilerge ózgerister engizý qajet.
Buǵan deıin SQO kásipkerleri óndiristi damytýǵa kedergi bolyp turǵan máselelerdi ataǵanyn jazǵan edik.
