SQO kásiporyndarynda ár úshinshi jumysshynyń jasy 50-den asqan
SQO ákimdiginiń otyrysynda Qumar Aqsaqalov óńirde aldaǵy ýaqytta jumys kúshine qajettiliktiń tek artatynyn aıtty. Sońǵy 10 aıdyń qorytyndysy boıynsha oblystyń ekonomıkasy qarqyndy damyp keledi. Al ekonomıka ósken saıyn jumys kúshine degen qajettilik te arta bermek.
«Qazir birneshe joba júzege asyrylyp jatyr. Elektrotehnıkalyq ónim shyǵaratyn kásiporynǵa 300 maman, termos-vagon qurastyrýǵa 200 jumysshy, aýyl sharýashylyǵy tehnıkasyn qurastyrýǵa 100 adam qajet bolady. Budan basqa lamınattalǵan fanera, polıpropılen ydystar, kirpish, qaǵaz buıymdaryn shyǵarmaqpyz. «ZIKSTO» zaýyty ónim kólemin arttyrmaq. Nátıjesinde barlyǵy 1200-deı jumysshy kerek bolady. Al óńir kásiporyndarynda eńbek etip júrgen ár jumysshynyń jasy 50-den asqanyn eskersek, jas mamandarǵa degen suranystyń jyldan jylǵa artatyny sózsiz», - deıdi SQO ákimi Qumar Aqsaqalov.
Óńir basshysy bul máseleni sheshý úshin jergilikti kásiporyndarǵa qajetti mamandardy ózderine daıarlaýdy usyndy. Ol Petropavldaǵy «Radýga» JShS tájirıbesin basqalarǵa úlgi etti.
«Radýga» JShS ınnovatsııalyq kásibı damý kolledjin ashyp, jaqsy bastamany qolǵa aldy. Qazir onda 20 stýdent bilim alyp jatyr. Oqý ornyn bitirisimen osy kásiporynǵa jumysqa alynady. Oblystaǵy iri ónerkásip oshaqtary, aýyl sharýashylyǵy qurylymdary buǵan mán berýleri qajet», - dedi óńir basshysy.
«Radýga» JShS kolledji ózderine qajet mamandardy – avtomatty jáne jartylaı avtomattandyrylǵan jeliler men qondyrǵylardyń operatorlaryn oqytyp jatyr. Alǵashqy memlekettik tapsyrysty da aldy.
