SQO kásiporyndary Qorǵanys mınıstrligimen yntymaqtastyq ornatýǵa daıyn

PETROPAVL. QazAqparat - Soltústik Qazaqstandaǵy kásiporyndar Qorǵanys mınıstrligimen yntymaqtastyq ornatýǵa daıyn, dep habarlaıdy QazAqparat Qorǵanys mınıstrliginiń baspasóz qyzmetine silteme jasap.

Qorǵanys mınıstrligi Qarýly Kúshterdiń qajettiligin eskere otyryp, Petropavl aýyr mashına jasaý zaýytymen jáne S.M. Kırov atyndaǵy zaýytpen birge keleshektegi arnaıy ónimdi óndirý múmkindikterin qarastyrýda.

Soltústik Qazaqstan oblysyna jumys sapary barysynda qorǵanys mınıstri Nurlan Ermekbaev atalǵan zaýyttar jumysymen tanysyp, kásiporyndar basshylyǵymen kezdesti. Onda óndiristik qýat júktemesin jáne ónim jetkizýdi arttyrý máseleleri talqylandy.

PAMJZ – arnaıy ónimniń, kópbeıindi óndiristik qýaty bar munaı-gaz, energetıkalyq jáne temir jol jabdyǵynyń qazaqstandyq óndirýshisi sanalady.

S.M. Kırov atyndaǵy zaýyt elektrtehnıkalyq ónimniń, baılanys quraldarynyń, qaýipsizdik júıeleri men arnaıy maqsattaǵy ónimniń óndirisine mamandanady.

Odan basqa, Petropavlǵa jumys sapary sheńberinde Qorǵanys mınıstrligi, Soltústik Qazaqstan oblysy ákimdigi men «Jas sarbaz» balalar men jasóspirimder áskerı-patrıottyq qozǵalysy» respýblıkalyq qoǵamdyq birlestigi arasynda jastardy áskerı-patrıottyq tárbıeleý salasyndaǵy yntymaqtastyq pen ózara is-qımyl týraly memorandýmǵa qol qoıyldy. Atalǵan memorandým birlesken is-sharalardy, baǵdarlamalar men jobalardy iske asyrýǵa, áskerı-patrıottyq tárbıe salasynda aqparat pen tájirıbe almasýǵa múmkindik beredi.

Sonymen qatar, qorǵanys mınıstri 2019 jylǵy kúzde Arys qalasyndaǵy tótenshe jaǵdaı saldaryn joıý kezinde qaza tapqan maıor Aqyshevtiń ata-anasymen kezdesti. Ol marqumnyń otbasy men jaqyndaryna kóńil aıtyp, ákesine І-shi dárejeli «El qorǵany» medalin tabys etti.

Esterińizge sala keteıik, «El qorǵany» vedomstvolyq medali 2017 jyldan bastap úlgili qyzmeti men memleket qorǵanysyna salmaqty úles qosqan áskerı qyzmetshilerge beriledi.