SQO kásipornynyń ónimi «Qazaqstannyń úzdik taýary» atandy
SQO Kásipkerler palatasy baspasóz qyzmetiniń habarlaýynsha, respýblıkalyq baıqaýda «Kazmıasoprodýkt» JShS «Úzdik azyq-túlik ónimderi» atalymynda jeńimpaz atandy. Shujyqtyń 130-dan astam túrin shyǵaratyn kásiporyn 2005 jyly qurylǵan. Zamanaýı qondyrǵylarmen jabdyqtalǵan tsehtardan qazir aıyna 100 tonna ónim tutynýshylaryna jóneltiledi.
«Bizdiń shujyqtardyń sapasy eń aldymen qoldanylatyn shıkizatqa baılanysty. Ony jergilikti sharýalardan alamyz. Al kásiporynda bizdiń bilikti mamandar osy zamanǵy qondyrǵylardyń kómegimen jáne tıisti standarttardan aýytqymaı sapaly ónim ázirleıdi. Bul - bizdiń úlken ujymnyń eńbeginiń jemisi», - dedi «Kazmıasoprodýkt» JShS dırektory Serik Іlııasov.
Qazirgi tańda kásiporynda 140 óńir turǵyny eńbek etedi. Óz ónimderin oblys, respýblıka aýmaǵynda ǵana emes, kórshi Reseıge de satady. Bıyl kúzde kásiporynnyń ónimi Máskeý qalasynda ótken «WorldFood Moscow» halyqaralyq kórme-baıqaýynda úsh altyn medal alǵan edi.
Jalpy, respýblıkalyq baıqaýǵa SQO-dan 9 kásiporyn qatysty. Olardyń taǵy ekeýi úzdikter qatarynan kórindi. «Paryz» baıqaýynyń «Úzdik áleýmettik jaýapty kásiporyn» atalymynda «Ilınskoe» JShS jeńiske jetse, «Izolıt» JShS «Ekologııaǵa qosqan úlesi úshin» atalymynda syıaqymen marapattaldy. Al Aıyrtaý aýdanyndaǵy «KókshetaýStroıNedra» JShS dırektory Sergeı Belıkke Memleket basshysynyń atynan Qurmet gramotasy tabys etildi.
