SQO kásipkerleriniń ónimderi Reseı, Tájikstan men Túrikmenstanǵa eksporttalady
Kásipkerler palatasy baspasóz qyzmetiniń málimetinshe, byltyr berilgen sertıfıkattyń 2 119-yn eksporter bıznesmender alǵan. Taýardyń shyqqan jerin rastaıtyn sertıfıkat kedendik rásimdeýde qajet. 2014 jyldan bastap osyndaı qujattardy «Atameken» ulttyq kásipkerler palatasy berip keledi.
«Kásipkerlerge birneshe sertıfıkat beremiz. Máselen, ST-KZ sertıfıkaty taýardyń Qazaqstanda jasalǵanyn ǵana kórsetip qoımaı, memlekettik satyp alý boıynsha konkýrsqa qatysatyndardyń barlyǵyna qajet. Byltyr onyń 310-yn berdik. Sondaı-aq 7 ındýstrıaldy sertıfıkat tabystaldy.
Taýaryn eksportqa shyǵaratyndarǵa beriletin sertıfıkat Eýroodaq elderiniń keıbirinde ónim óndirýshilerge jeńildik beredi. Mysaly, keden salyǵy azaıtylýy nemese odan múldem bosatylýy múmkin. Sertıfıkat syrtqy saýdada eshqandaı artyqshylyq bermese de, sheteldik seriktes óz zańdaryna sáıkes bul qujattyń bolýyn talap etýi múmkin», - deıdi SQO kásipkerler palatasynyń mamany Oleg Jýgın.
Byltyr soltústikqazaqstandyq bıznesmender óz ónimderin negizinen Reseıge, Tájikstan men Túrkmenstanǵa saýdalaǵan. Shet elge sút ónimderi, muzdatylǵan jartylaı daıyn ónimderdi, makaron, zyǵyr, maqsary tuqymyn, bıdaı glıýteni, krahmal, taǵy qurǵaq astar men sabyn, kúndelikti turmysqa qajet plastık buıymdar shyǵarylǵan. Barlyq sertıfıkattardyń 34 %-y osy taýarlardyń eksportyna berilgen.
«Ózbekstanmen de jaqsy baılanys ornatylǵan. Ótken jyly berilgen sertıfıkattardyń 3 %-y osy elge tıesili, bıdaı eksporttaldy. Iran, Qytaı, Aýǵanstanǵa da negizinen bıdaı men maıly daqyldar satylady. Osy maqsatta barlyq sertıfıkattardyń 30%-y berildi. Qalǵan 5%-y jasymyq, bıdaı, burshaqty, zyǵyr kúnjarasyn Túrkııa, Italııa, Belgııa, Nıderlandy, Polsha jáne Germanııa elderine shyǵarýǵa jasaldy», - deıdi Oleg Jýgın.
2020 jyly otandyq taýar óndirýshiler tizilimine 7 kásiporyn kirdi. Olardyń úsheýi mashına jasaýmen, bireýi tigin ónerkásibimen, ekeýi jıhaz jasaýmen jáne bireýi hımııa ónerkásibi. Olardyń barlyǵyna ındýstrıaldy sertıfıkat berildi.
