SQO kásipkerlerine 200 sý qoımasy beriledi
PETROPAVL. QazAqparat - SQO kásipkerlerine 15 ańshylyq jer, 200-ge jýyq balyq sharýashylyǵy sý qoımalary jalǵa beriledi, dep habarlady óńirlik kásipkerler palatasynyń baspasóz qyzmetine silteme jasap «QazAqparat» HAA tilshisi.
Baıqaý 12 jáne 17 jeltoqsanda ótedi. Tender ótkizý tártibi men onyń jaǵdaıyn májilis-semınarda bıznes sýbektilerine palata, tabıǵı resýrstar jáne tabıǵat paıdalanýdy retteý basqarmasynyń mamandary túsindirdi.
«Shara osy saladaǵy bıznesti qoldaýǵa baǵyttalǵan oblys prokýratýrasy jobasynyń start-apyn iske asyrý barysynda ótkizildi. Kóbinese qatysýshylar qujattardy durys resimdemeıdi ne tolyq usynbaıdy. Bul iste usaq-túıek mańyzdy», - dedi mamandandyrylǵan tabıǵat qorǵaý prokýrory Jasulan Smaǵulov.
Prokýrorlardyń aıtýynsha, memleket ańshylyq pen balyq aýlaý bıznesin damytýǵa múddeli.
«Bul jaramdy jerdi bekitýge múddelimiz. Jalǵa alýshy kúzetti júzege asyrýǵa, ańshylyqty nemese balyq sharýashylyǵyn damytý jumystaryn júrgizýge, janýarlardyń kóshi-qonyn zerdeleýge, olardyń sanyn baqylaýǵa mindetti. Búginde baıqaýǵa qoıylǵan ýchaskelerde brakonerlik jıi oryn alady, sebebi olardy eshkim baqylmaıdy. Al paıdalanýshynyń ańshy (eger) qyzmeti, arnaıy tehnıkasy bolýǵa mindetti. Sý qoımalaryn jalǵa alýshylarmen de is ótkir másele, olardyń óz damýǵa baǵyttalǵan mindettemeler tizbesi bar», - dep atap ótti ol.
Baıqaýǵa qatysý úshin áleýetti jalǵa alýshylar óz sharýashylyǵynyń damý josparyn usynýǵa mindetti. Óńirlik kásipkerler palatasynda atap ótkendeı, SQO-nyń kóptegen bıznesmenderi osy salada bıznes bastaýdy jón sanaıdy, óıtkeni bul baǵyt keńinen qamtyla túspek.
Jyl ishinde barlyǵy 45-ke jýyq ańshylyq jerdi utysqa shyǵarý josparlanýda.
