SQO kásipkerleri Jeńis kúni qarsańynda maıdangerlerge arnap eskertkish ornatty

PETROPAVL. QazAqparat - SQO Mamlıýt aýdanyndaǵy Beloe aýylynyń kásipkerleri Jeńis kúni qarsańynda Ekinshi dúnıejúzilik soǵys jaýyngerleri qurmetine Dańq memorıalyn ornatty, dep habarlaıdy QazAqparat tilshisi.

Beloe aýylynda Ekinshi dúnıejúzilik soǵysqa qatysqan jaýyngerlerge arnalǵan eskertkish bolǵan. Ondaǵan jyl buryn qoıylǵan músinder jeldiń ótinde, jaýyn-shashynnyń astynda turǵandyqtan mújilip, syry ketken eken. Muny kórgen eldimekendegi 4 kásipker 9 mamyr - Jeńis kúnine oraı aýyldastaryna syı jasaýdy uıǵarady.

«Uly Jeńistiń 74 jyldyǵyna oraı «Kýlık», «Beloe Agro» jáne «Tıýrkın ı K» JShS-teri men Sergeı Bychkovtiń sharýa qojalyǵy osy eskertkishti qaıta jóndeýge sheshim qabyldadyq. Sebebi, jas urpaq ata-ájeleriniń batyrlyǵy jaıly árqashanda bilýi tıis. Merekege úlgerip, barlyq jumystardy ýaqtyly aıaqtaǵanymyzǵa óte qýanyshtymyz», - deıdi kásipker Talǵat Áljanov.

Kásipkerler músinderdi jónge keltirip qana qoımaı, qasyna eldimekennen soǵysqa attanǵan jaýyngerlerdiń esimderi granıtke oıylyp jazylǵan taqtalar ornatty. Mańyn ǵana emes, qasyndaǵy saıabaqty da abattandyryp jónge keltirdi.

Eskertkishtiń ashylýyna oraı jáne soǵysta qaza tapqan jaýyngerlerdiń qurmetine Beloe aýylynda mıtıng ótti. Jergilikti ónerpazdar kontsert qoısa, Aýdan ortalyǵynan kelgen Jeńis avtosherýi eldimeken kóshelerin aralap ótti.

Jalpy Beloe aýyldyq okrýginen 411 er-azamat soǵysqa qatysqan eken. Olardyń kópshiligi maıdan dalasynda qaldy. Qazir eldimekende soǵys kýágerleri qalmaǵan. Mamlıýt aýdanynda úsh ardager turyp jatyr.