SQO kásipkerleri shekara beketterindegi uzyn-sonar kezekke shaǵymdandy
Sybaılas jemqorlyqqa qarsy qyzmet ókilderi uıymdastyrǵan oblystyń kásipkerlerimen ótken «Adal bussiness» dıalog alańynda bıznes ókilderine ózekti suraqtar qoıyp, alańdatqan máselelermen bólisýge múmkindik berildi.
Halyqaralyq júk tasymalymen aınalysatyn jeke kásipker Sabyr Bekqojın shekara qyzmetindegi uzyn-sońar kezekke shaǵymdandy.
Onyń aıtýynsha, kezek memlekettik kirister departamentiniń qyzmetkerleriniń qujattardy uzaq tekserýinen paıda bolatyn kórinedi.
«Mynadaı másele jıi týyndap jatady: shekarada memlekettik kirister komıtetiniń qyzmetkerleri qujattardy skanerlep, júrgizýshiden ózi bilmeıtin qujattarǵa qatysty suraqtar qoıady. Sóıtip kezek týyndaıdy. Bizdiń júrgizýshiler eńbek jáne demalys rejımi boıynsha jumys isteıdi, al kezek 10 saǵatqa deıin sozylýy múmkin. Júrgizýshi bul ýaqytta ortasha 50 km jyldamdyqpen 500 km júrip tastaı alady. Ne úshin qosymsha qıyndyqtar jasaıdy? Keden odaǵy paıda bolǵan soń Reseı shekarasy arqyly ońaı ótemiz dep úmittengenbiz», - dedi kásipker.
Soltústik Qazaqstan oblysy boıynsha Memlekettik kirister departamenti basshysynyń orynbasary Rýslan Rahymberdi qyzmet ókilderiniń shekarada turýynyń oryndy ekenin aıtty. Kásipkerler istiń barlyq qyr-syryn bile bermeıdi.
«Shekarada eksporttyq baqylaý basqarmasy tur. Olardyń mindeti - taýar men júktiń ótýin baqylaý. Taýarlardy shekaradan ótkizip, kirgizýdiń shekteýleri bar. Qujatsyz ótetin júkter qanshama. Alaıda Sizder ony baıqamaısyzdar. Mysaly, taýardyń syrty shyryn nemese kola sııaqty bolǵanymen, ishinde ishimdik, temeki bolýy múmkin. Kún saıyn barlyq beketterde osyndaı kidirtýler bop turady», - dedi R.Rahymberdi.
Sybaılas jemqorlyqqa qarsy qyzmet basshysy Ernar Baıanǵazınniń oıynsha, túsinispeýshilikter kásipkerlerdiń nashar aqparattandyrylýynan bolady. Ol departamentke bıznes ókilderine barlyǵyn jeńil tilmen, shekaradan ótkende qandaı másele týyndaıtynyn jáne aldyn ala qandaı qujattar daıyndaý kerek ekenin túsindirýge keńes berdi.
