SQO kásipkerleri ónimderin eksporttaý úshin bıyl 1700-ge jýyq sertıfıkat aldy
SQO kásipkerler palatasy baspasóz qyzmetiniń málimetinshe, taýardyń shyqqan jerin rastaıtyn sertıfıkat kedendik rásimdeýden ótkende qajet. «Atameken» ulttyq kásipkerler palatasy mundaı qujattardy 2015 jyldyń naýryzynan berip keledi. Bıyl óńir kásipkerleri 1674 sertıfıkat alsa, sonyń 1461-i eksporterlerge berilgen. Jalpy palata mundaı sertıfıkattyń birneshe túrin beredi.
«ST-KZ sertıfıkaty taýardyń Qazaqstanda jasalǵanyn ǵana kórsetip qoımaı, memlekettik satyp alý boıynsha konkýrsqa qatysatyndardyń barlyǵyna qajet. Jyl basynan ST-KZ úlgidegi qujat 213 ret berilgen. Ózbekstan úshin ST-1 formaly sertıfıkat kerek. A sertıfıkaty Eýroodaq elderiniń keıbirinde ónim óndirýshilerge jeńildik beredi. Sondaı-aq bizdiń bıznesmenderdi eskertkim keledi, 1 mamyrdan bastap bul sertıfıkatty Norvegııa men Shveıtsarııa qabyldamaıdy. Osy elder úshin ónim óndirýshiler REX-júıesinde tirkelip, tirkeý nómirin alýy tıis», - deıdi SQO kásipkerler palatasynyń mamany Anastasııa Marchenko.
Mamannyń aıtýynsha, taýaryn eksportqa shyǵaratyndarǵa beriletin sertıfıkat ónim óndirýshilerge keı jeńildik berýi, mysaly, keden salyǵyn azaıtyp nemese odan múldem bosatýy múmkin. Al keıbiri onyń Qazaqstanda jasalǵandyǵyn naqtylaıdy.
«Ónim óndirýshiler men taýardy jiberýshilerden kúndelikti ótinish qabyldaımyz. ST-1 úlgidegi 502 sertıfıkat soltústikqazaqstandyq bıznesmenderge taýarlaryn Tájikstanǵa, Reseıge, Belarýs Respýblıkasyna, Ýkraına, Qyrǵyzstan jáne Túrkmenstanǵa shyǵarý úshin berildi. Ózbekstanǵa 293 sertıfıkat toltyryldy. Soltústikqazaqstandyq kásipkerler bul elge negizinen bıdaı, kebek jáne bıdaı krahmalyn jiberedi. Qyrǵyzstan men Tájikstanǵa jáne Reseıge bıdaı eksporttalady. Reseı, sondaı-aq makaron ónimderin, qatyrylǵan jartylaı fabrıkattardy, muzdatylǵan balyqty, sút ónimderin, bıdaı glıýtenin, zyǵyr, raps, soıany alady. Ýkraınadan qaraqumyqqa, bıdaı krahmalyna, zyǵyr men jasymyqqa suranys bar. Iranǵa arpa, bıdaı, Aýǵanstanǵa un, taýyq jumyrtqasy, Qytaıǵa bıdaı men zyǵyr maıy, Túrkııaǵa qatty bıdaı men jasymyq eksporttalady», - deıdi SQO kásipkerler palatasynyń dırektory Álibek Áshmetov.