SQO kásipkerleri dárigerlerge arnaıy qorǵanys kıimderin satyp alyp berdi

PETROPAVL. QazAqparat – Soltústik Qazaqstan oblysynda kásipkerler jergilikti dárigerlerge qorǵanys kıimderin satyp alyp berip jatyr, dep habarlaıdy QazAqparat tilshisi.

Aımaqtyq kásipkerler palatasy baspasóz qyzmetiniń málimetine sáıkes, obaǵa qarsy kóp ret kıiletin 20 kostıým, 20 qorǵaný kózildirigi jáne 40 respırator satyp alynǵan. Qorǵanys quraldary birinshi qalalyq aýrýhananyń qyzmetkerlerine berildi.

«Aımaqtyq palata keńesi músheleriniń bastamasymen jarty mıllıonnan astam teńgege jeke qorǵaný quraldary satyp alynǵan. Qasıetti Ramazan aıynda ıgi ister kóp jasalatynyna senemin», - dedi aımaqtyq kásipkerler palatasynyń dırektory Darhan Qalıev.

Buǵan deıin «Esil-Dıagnostık» JShS oftalmologııalyq ortalyǵy birinshi qalalyq aýrýhananyń dárigerleri úshin 1 mln teńgege qorǵaný kıimderin satyp alǵan. Kompanııanyń qazirgi kezde shyǵyny kóp bolǵanyna qaramastan, ol koronavırýs indetimen kúresip júrgen dárigerlerge kómektesýge nıet bildirgen. Kompanııa aýrýhana ujymyna birneshe ret kııýge bolatyn Túrkııada tigilgen 100-ge jýyq qorǵaný kostıýmin berip jiberdi.