SQO kásipkeri mekteptiń 12 túlegine turǵyn úı sertıfıkattaryn syılady

PETROPAVL. QazAqparat – Soltústik Qazaqstan oblysynyń kásipkeri óz aýdanynyń mektep túlekterine turǵyn úı sertıfıkatyn syılady, dep habarlaıdy QazAqparat tilshisi.

Búgin Jambyl aýdanynda 178 túlek altyn uıa mektebimen qoshtasty. Mektep bitirý keshinde jastardyń keıbiri attestatpen birge 100 myń teńgege turǵyn úı sertıfıkatyn da aldy. Bul jergilikti kásipkerdiń úzdik túlekterge syıy. Sertıfıkatqa ıe bolǵandardyń 10-y úzdik attestat alsa, ekeýi «Altyn belgi» ıegeri.

Dılnaz Romanova Qojabergen jyraý atyndaǵy Presnovka jalpy orta bilim berý mektebiniń túlegi. Ol UBT-da 117 ball aldy.

«Men atam men ákemniń jolyn qýyp, tehnıkalyq mamandyqty tańdamaqpyn. Mektepte súıikti pánim fızıka boldy. Búgingi syılyqqa qýanyshtymyn. Bankte mindetti túrde shot ashamyz», - deıdi Dılnaz Romanova.

Saltanatty jıynǵa Otbasy bank ókilderi kelip, sertıfıkatty qalaı tıimdi paıdalanýǵa bolatynyn aıtty.

«Bul sertıfıkattar túlekterge barlyq turǵyn úı baǵdarlamasyna qatysýǵa múmkindik beredi. Olar óz atyna bankte shot ashyp, depozıtti únemi tolyqtyryp otyrýy qajet. Keıin qarajat jınalǵanda elimizdiń kez kelgen qalasynan baspana ala alady. Ol aqshany sheship alýǵa da bolady. Biraq men qarjyny almaı, kerisinshe, bizdiń bankte ony tolyqtyryp otyrýǵa keńes beremin», - deıdi «Otbasy bank» AQ SQOF dırektory Almas Japabaev.

Metsenat óz aýdanynyń úzdik túlekterine 5 jyldan beri osyndaı sertıfıkat berip keledi. Osy ýaqytqa deıin 41 túlekke qoldaý kórsetti.