SQO kardıologtary júrek qaqpaqshasyn ımplanttaýdyń biregeı tásilin meńgerdi
Petropavldaǵy kardıologııalyq ortalyqta búgin dárigerler ádettegiden kóp. Jergilikti mamandardan bólek, Nur-Sultan, Qaraǵandy, Óskemen, Semeı, Oral qalalarynan kelgen kardıologtar sheteldik áriptesteriniń sheberlik saǵatyna qatysyp, jańa tásildi meńgermek.
Syrqat – Ǵ.Músirepov atyndaǵy aýdannyń 72 jastaǵy turǵyny Nafısa Ýrazbahtına. Buǵan deıin qan tamyrlaryna stent qoıylǵan eken. Al júrek qaqpashasy janyndaǵy ýaqyt óte kele tarylǵan aorta tesigin úlkeıtýge dárigerler buǵan deıin batpaǵan. Endi oǵan kishkentaı tilik arqyly zamanaýı ımplant qoıylady.
«Aortaldy stenoz – júrek qaqpashasy janyndaǵy aorta tesiginiń tarylýy. Bul derttiń saldarynan qannyń júrýi qıyndaıdy. Syrqattyń basy aınalady, talyp, tez sharshaǵysh bolady. Entigip, dem ala almaı tunshyǵady. Bul naýqastardy emdep-jazý óte qıyn. Ota jasalyp, aortaldy qaqpashaǵa protez qoıylady. Transkateterlik ımplantatsııa jasy 70-ten asqandarǵa, kóptegen sozylmaly aýrýlary bar bolǵandyqtan júrekke ashyq ota jasaýǵa jaramaıtyn syrqattarǵa qoldanylady.
Mundaı otalar Almaty, Nur-Sultan jáne taǵy birqatar oblys ortalyqtarynda jasalady. Biraq bul jolǵy erekshelik – Qazaqstanda alǵash ret protez retinde qara maldyń júrek qaby alyndy», - deıdi SQO kardıologııalyq ortalyqtyq kardıologııalyq blok meńgerýshisi Maqsat Qudrattýlaev.
Mamannyń aıtýynsha, oblys boıynsha ota qajet 7 adam anyqtalǵan.
«Syrqattardy Nur-Sultan qalasynda kompıýterlik tomograftan ótkizdik, óıtkeni bizdiń ortalyqta ondaı qondyrǵy joq, qujattaryn Eýropadaǵy áriptesterimizge jiberdik. Ol jerde syrqattarǵa keletin qaqpashalardy daıyndady. Sol jeteýiniń ishinen tek úsheýine búgin ota jasalady. Jalpy, óńirde mundaı syrqattar kóp.
Bul otanyń biregeıligi – júrek qaqpashasy tarylady, alaıda qaqpashanyń óz dıametri úlken. Sondyqtan biz protezdi qoıǵan kezde ol jabylady. Syrqattyń jaǵdaıyn ýshyqtyryp almaı úshin, jumysty tez atqarý kerek. Al bul – qara maldyń júrek qabynan jasalǵan bıoprotezdi qoıý kezinde tamyr jabylmaı, qan júre beredi. Sondyqtan biz otany asyqpaı, sapaly jasaı alamyz. Ári adam aǵzasy ony tezirek qabyldap, tez jazylady» - deıdi Maqsat Qudrattýlaev.
Qazaqstanda qazir qoldanylyp júrgen qaqpashalar sıntetıkalyq materıaldan jasalǵan. Al qara maldyń júrek qabynan jasalǵan ımplant Shveıtsarııada óndiriledi.
«Bul qazir bizdiń ortalyqta jasalyp otyrǵan eń kúrdeli ota. Qaqpasha alynbaıdy, eger dert qaıtalanatyn bolsa, bul protezdi ústinen qaıta qoıýǵa bolady. Bul – qymbat ota. MÁMS aıasynda júrgizilip otyr. Shamamen 6,5 mln teńge turady. Bul tásildi ortalyqqa engizý úshin jergilikti maman 7 ota jasap, arnaıy sertıfıkat alýy qajet», - deıdi kardıolog.
Jalpy ota 40 mınýtqa shaqtalǵan. Biraq, alǵashqy jáne sheberlik saǵaty bolǵandyqtan shamamen 1,5 saǵatqa sozyldy.
«Meniń dárigerlerge alǵysym sheksiz. Meniń ómirimdi qutqaryp qaldy. Esimdi bilip jattym, bári jaqsy boldy», - deıdi Nafısa Ýrazbahtına.
Syrqatqa ota jergilikti anestezııamen jasaldy. Saýyǵý-qalypqa kelý merzimi de mundaı otadan keıin tez, bir aptadan keıin Nafısa úıine jiberiledi.
«Búgingi ota sátti jasaldy, nátıjesi óte jaqsy. Kardıologııalyq ortalyqtyń materıaldyq-tehnıkalyq jaraqtandyrylýy, mamandardyń daıyndyǵy óte joǵary. Komandalyq jumys baıqaldy. Desek te, bolashaqta osyndaı otalar jasalatyn bolsa, ortalyqqa kompıýterlik tomograf alý qajet. Bul syrqattardy anyqtaýǵa jáne otadan keıin olardyń jaǵdaıyn baqylaýda ustaýǵa kerek. Men mundaı otalardy 5 jyldan artyq jasap kelem, tájirıbem jetkilikti. Osy ýaqytqa deıin 500-den astam júrek qaqpashasy ımplantyn qoıdym», - deıdi medıtsına ǵylymdarynyń doktory, Glazgo dárigerleri men hırýrgtarynyń koroldik kolledjiniń jáne kardıologtardyń eýropalyq qoǵamynyń múshesi Keıt Dj Oldroıd.
Búgin tesý arqyly júrekke taǵy eki ota jasalmaq.
«Buǵan deıin júrek qaqpashasyn aýystyrý úshin júrekke ashyq ota jasaıtynbyz. Biraq ondaı otany egde jastaǵylarǵa jasaýǵa bolmaıdy, óıtkeni kótere almaıdy. Endi bul másele sheshimin taýyp otyr. Jarty jylǵa jýyq daıyndalyp, sheteldik mamandarmen kelisip, búgin eýropalyq áriptesterimiz bizge kelip sheberlik saǵatyn ótkizip jatyr. Úsh kúnge shaqtalǵan. Bolashaqta bul otalardy bizdiń óz mamandarymyz jasaıdy. Jylyna osy tásilmen eń keminde 30-40 ota jasaýdy josparlap otyrmyz», - deıdi SQO kardıologııalyq ortalyqtyń dırektory Azamat Maǵzumov.