SQO: Karantınde medqyzmetkerlerdi tamaqpen, jatyn orynmen qamtyǵan kásipker marapattaldy
PETROPAVL. QazAqparat – Soltústik Qazaqstan oblysynda karantın ýaqytynda medıtsınalyq qyzmetkerlerdi meımanhanasyna tegin ornalastyryp, ystyq tamaqpen qamtamasyz etken kásipker marapattaldy, dep habarlaıdy QazAqparat tilshisi.
SQO kásipkerler palatasy baspasóz qyzmetiniń málimetinshe, petropavldyq
kásipker Aıtyqan Qalǵaeva alǵashqylardyń biri bolyp «ArýAna» músinshesine ıe boldy.
«ArýAna» respýblıkalyq syılyǵy byltyr «Atameken» ulttyq kásipkerler
palatasynyń bastamasymen taǵaıyndalǵan edi. Maqsat – kásipker áıelderdiń ekonomıkalyq belsendiligin arttyrý. Endi jylda aýmaqtyq deńgeıde 17 marapat jáne respýblıkalyq deńgeıde 1 Gran-prı beriledi. Baıqaýdyń aýmaqtyq jeńimpazyna «ArýAna» músinshesin jáne dıplomdy SQO kásipkerler palatasynyń dırektory Arman Orazǵulov tabys etti.
Aıtyqan Qalǵaeva SQO kásipkerler palatasy janyndaǵy isker áıelder keńesiniń tóraǵasy.
«Óńirde áıelder bıznesin damytýda isker áıelder keńesiniń atqaryp jatqan jumysy zor. Aıtyqan Qalǵaeva sonyń basy-qasynda júr. Ol ózi de aýyrdy, soǵan qaramastan qoǵamdyq jumystardan, qaıyrymdylyq is-sharalarynan qalys qalmady», - deıdi kásipkerdiń áriptesi Álııa Ibraeva.
