SQO Indýstrııalandyrý kartasy aıasynda 41 joba júzege asyrylady - oblys ákimi

PETROPAVL. QazAqparat - Soltústik Qazaqstan oblysy Indýstrııalandyrý kartasynyń aıasynda jalpy quny 30 mlrd teńgeden astam 41 joba júzege asyrylýda. Bul týraly búgin Ortalyq kommýnıkatsııalar qyzmetiniń aımaqtyq fılıalyna kelip, «100 naqty qadam» Ult josparynyń oryndalý barysy týraly baıandaǵan SQO ákimi Erik Sultanov málim etti.

«Indýstrııalandyrý kartasy aıasynda óńirde jalpy quny 30 mlrd. teńgeden asatyn 41 joba júzege asyrylýda. Osylaısha, 1,8 myńnan astam jumys orny qurylady»,-dep atap ótti ákim.

E.Sultanovtyń habarlaýynsha, bıyl osy jobalardyń arasynan 11 joba tolyq aıaqtalyp, iske qosylǵan. 11 jobanyń arqasynda 400 adam jumys tapqan. Oblys sondaı-aq ımportty almastyratyn óndiristerdi ıgermek eken.