SQO halqy tabysynyń jartysyna jýyǵyn azyq-túlikke jumsaıdy
PETROPAVL. QazAqparat - Soltústik Qazaqstan oblysynda turǵyndar tapqan tabysynyń 45,6% azyq-túlik taýarlaryn satyp alýǵa jumsaıdy, dep habarlaıdy QazAqparat.
SQO statıstıka departamenti baspasóz qyzmetiniń málimetinshe, ekinshi jarty jyldyqta turǵyndardyń jan basyna shaqqandaǵy aqshalaı shyǵyndary 171 myń teńgeni quraǵan. Bul ótken jylmen salystyrǵanda 4,9% artyq. Halyq tapqan tabysynyń eń úlken bóligin - 45,6% azyq-túlik taýarlaryn satyp alýǵa jumsasa, azyq-túlik emes taýarlardy satyp alý shyǵystary – 23,6%-dy, aqyly qyzmetterge jumsalǵan qarajat - 18,2%-dy quraǵan.
Mamandardyń aqparatyna súıensek, oblys turǵyndarynyń azyq-túlikke jumsaıtyn qarajatynyń negizgi bóligi (27,2%) et pen et ónimderin jáne nan jáne jarma ónimderin (15,7%) satyp alýǵa ketedi. Al azyq-túlikke jatpaıtyn taýarlardyń ishinde soltústikqazaqstandyqtar negizgi qarajatty kıim jáne aıaq kıim satyp alýǵa jumsaıdy eken.
Aqyly qyzmetter shyǵyndarynda qarajattyń 35,6% turǵyn úı-kommýnaldyq qyzmetterge jumsalsa, mádenı is-sharalar men demalysqa otbasy bıýdjetinen nebary 5,4% bólingen.
