SQO gaz kompanııasy baǵanyń tómendeýine baılanysty sotqa júgindi

«Gorgaz-servıs» JShS Tabıǵı monopolııalardy retteý komıteti Soltústik Qazaqstan oblysy boıynsha departamentiniń sheshimimen kelispeı, mamandandyrylǵan aýdanaralyq ákimshilik sotqa aryzdandy, dep habarlaıdy QazAqparat tilshisi.

Tabıǵı monopolııalardy retteý komıtetiniń SQO boıynsha departamenti «Gorgaz-servıs» JShS-niń usynysyn qaraǵan. Kompanııa aldaǵy ýaqytta toptyq rezervýarlyq qondyrǵylar arqyly suıytylǵan munaı gazyn bólshek saýdada ótkizýdiń shekti baǵasyn kótermek bolǵan. Joba boıynsha 1 m3 úshin 677,27 teńge bolýy tıis edi, bul buryn qoldanysta bolǵan shekti baǵadan 136,87 teńgege nemese 25,33% joǵary.

Departament aqparatty qarap, «Gorgaz-servıs» JShS-niń jobalanǵan baǵasyn shekti baǵa deńgeıine deıin tómendetken. Solaı, qosymsha qun salyǵyn esepke almaǵanda baǵany 517,45 teńge/m3 mólsherinde bekitti. Bul buryn qoldanysta bolǵan shekti baǵamen salystyrǵanda 22,95 teńgege nemese 4,25% tómen. Jańa tarıf bıyl 1 tamyzda qoldanysqa engizildi.

«Gorgaz-servıs» JShS shekti baǵasyn qaraı kele, mamandar 91 mln astam teńge amortızatsııalyq aýdarymdar qarajatynyń maqsatsyz paıdalanǵanyn eskergen. Bul nátıjesinde burynǵy qoldanystaǵy baǵanyń tómendeýine ákeldi.

Tabıǵı monopolııalardy retteý komıtetiniń SQO boıynsha departamentiniń sheshimimen kelispeı, ony zańsyz dep taný úshin «Gorgaz-servıs» JShS SQO mamandandyrylǵan aýdanaralyq ákimshilik sotyna talap-aryz berdi. Qazirgi ýaqytta sot protsesteri júrip jatyr.