SQO ǵalymdary drondardy anyqtaıtyn neırondyq jelilik model jasap shyqpaq

PETROPAVL. KAZINFORM – Soltústik Qazaqstan oblysynyń ǵalymdary qorǵanys júıelerine kórinbeıtin zamanaýı drondardy anyqtaıtyn jańa tehnologııa jasaýdy qolǵa almaq. Jańashyldyqty júzege asyrýǵa Ǵylym jáne joǵary bilim mınıstrligi arnaıy grant bóldi.

Grant mólsheri — 99 mln 350 myń teńge. Úsh jyldyq joba Kozybayev University — jergilikti joǵary oqý ornynda qolǵa alynady. Jumysqa tehnıka ǵylymdarynyń kandıtaty Ildar Qurmashev jetekshilik etedi, oǵan qazaqstandyq jáne ıtalıandyq ǵalymdar kómektespek.

Maqsat — Data Fusion júıesine ıntegratsııalanatyn optıkalyq-elektrondyq arna arqyly ushqyshsyz basqarylatyn apparattardy tanýdyń neırondyq jelilik modelin ázirleý.

«Qazirgi ýaqytta ǵalymdar dron, kopterlerdiń kóptegen jańa túrlerin shyǵaryp jatyr. Olardy keıde qustan aıyra almaısyń. Biz qorǵanys júıelerine kórinbeıtin, alysqa ushatyn drondy tanıtyn tehnologııany jasap shyǵýymyz kerek. „Antıdron“ radıolokatsııalyq júıesin paıdalanamyz jáne radar qondyrǵysyn jetildirip, taný radıýsyn 2 km-ge deıin ulǵaıtamyz», — deıdi Ildar Qurmashev.

Ǵalymnyń aıtýynsha, drondardy anyqtaý úshin neırojúıelik qosymshaǵa qazirgi ýaqytta bar ushatyn apparattar jaıynda jáne túrli qustar týraly barlyq aqparat engiziledi. Osylaısha 20 myń nysan júkteledi.
Bul baǵdarlamaǵa aspandaǵy qaýipti apparattardy, sonyń ishinde basqa júıeler kóre almaıtyn usaq kopterlerdi anyqtaýǵa múmkindik bermek.
Aqerke Dáýrenbekqyzy